IIM basshysy Erlan Turǵymbaev blokpost jumysyna tartylǵan qyzmetkerlerge alǵys aitty. Bul týraly ministrliktiń baspasóz qyzmeti habarlady.
– Búkil álem qoǵamǵa jańa qaýip – qatermen-koronavirýs pandemiiasymen kúresýde. Qazaqstanda qalys qalǵan joq. Der kezinde qabyldanǵan sharalardyń, dárigerlerdiń, politseilerdiń, áskerilerdiń jáne eriktilerdiń janqiiarlyq erliginiń, sondai-aq halyqtyń jaýapkershiligi men tártiptiliginiń arqasynda bizdiń elimiz osy kezeńen az shyǵynmen ótýde, – dep atap ótti Ishki ister ministri Erlan Turǵymbaev qyzmet jáne bólimshe basshylarymen ótkizgen selektorlyq keńesinde.
Ministr QR Prezidenti Qasym-Jomart Toqaevtyń tapsyrmasy boiynsha, ishki ister organdarynyń barlyq kúshteri qoǵamdyq tártip pen turǵyndardyń qaýipsizdigin saqtaýǵa, karantindik is-sharalardy qamtamasyz etýge baǵyttalǵanyn aitty.
52 000–nan astam qyzmetkerler – politseiler, qutqarýshylar, áskeri qyzmetshiler jáne ishki ister organdarynyń meditsina qyzmetkerleri blokpostarda úzdiksiz qyzmet atqardy, tirshilikti qamtamasyz etýdiń mańyzdy obektilerin, meditsinalyq mekemeler men karantindik aimaqtardy kúzetti. Qoǵamdyq tártipti saqtaýdy kúsheitý úshin politsiia men Ulttyq ulan jasaqtarynyń sany men tyǵyzdyǵy artty.
Kósheler, saiabaqtar, skverler, turǵyn úi alaptary, saýda nysandary barynsha qamtyldy. Ózin-ózi oqshaýlaý jáne shekteý tártibi kezeńinde qabyldanǵan sharalardyń arqasynda eldegi qylmys 26% – ǵa tómendedi. Mundai erekshe rejimde politsiia jáne IIM-niń basqa da kúshteri alǵash ret jumys istedi.
– Bul ońai emes edi. Táýlik boiy jumys rejimi, birqatar jaǵdailarda dala jaǵdailarymen kazarmalyq jaǵdaiy, úi men otbasynan alshaqtyǵy, keide jekelegen azamattardyń túsinbeýi men qarsylasýy úlken psihologiialyq jáne fizikalyq júktemeler týdyrdy. Biraq bizdiń qyzmetkerlerimiz barlyq 78 kún boiy el basshylyǵy qoiǵan mindetterdi naqty oryndai otyryp, qyzmet ótkerýdi jalǵastyrdy, – dep atap ótti IIM basshysy.
Ishki ister jáne densaýlyq saqtaý organdarynyń barlyq qyzmetkerleri táýlik boiy jumys istedi jáne adamdarǵa qiyn ýaqytta kómek kórsetti, olardyń densaýlyǵyn qorǵaýda aldyńǵy shepte turdy. Tek ortaqtasa qarsy turýdyń ǵana arqasynda koronavirýs indetiniń jappai juqtyrylýyna jáne kóbeiýine jol berilmedi.
Qyzmettik mindetterin adal oryndaǵany, blok-bekette koronavirýstyq infektsiiamen kúres jónindegi is-sharalarǵa tikelei qatysqany úshin Ministrdiń buiryǵymen erekshe kózge túsken qyzmetkerler gramotalarmen jáne alǵys hattarmen marapattaldy.
IIM-niń qylmystyq–atqarý júiesi de shet qalmady, onyń mekemelerinde qysqa merzimde qorǵaý quraldaryn: táýekel aimaǵynda ornalasqan qyzmetkerlerge arnalǵan maskalar men kombinezondar óndirisi jolǵa qoiyldy. Osylaisha sottalǵandar da pandemiiamen kúreske óz úlesin qosty, olarǵa jeke alǵys aityldy.
– Eldi mekender arasyndaǵy blokposttar alynyp tastalady. Biraq bul qaýip joq degendi bildirmeidi. Azamattarǵa sanitarlyq talaptarmen saqtyq sharalaryn qatań saqtaý kerek, – dep túiindedi Erlan Turǵymbaev.
Eske sala keteiik, karantindik rejim kezinde elde 400-ge jýyq blokpost jumys istedi, oǵan 6 000-ǵa jýyq IIO qyzmetkerleri qatysty. Barlyq kezeńde blokpostarda 3,2 mln.-nan astam kólik quraldarymen 5 mln. jolaýshy tekserildi.
