Ishki ister ministri Erlan Turǵymbaev Almatyda kólikpen úsh adamdy qaqqan iske qatysty pikir bildirdi, dep habarlaidy QazAqparat.
«Aýrýhanada úsh adam jatyr. Olardy kólikpen eki adam qaqqan. Iaǵni eki kólikte eki júrgizýshi bolǵan. Bireýi ustaldy. Kólikter oqiǵa ornyna jaqyn mańda qaldyrylǵan», - dedi Erlan Turǵymbaev Úkimet otyrysynan keiin tilshilerge bergen jaýabynda.
Ministr tergeý múddesine sai kúdiktilerdiń esimin atai almaitynyn jetkizdi.
«Bul jerde birneshe bap boiynsha qarastyrylady. Birinshiden, jiktelýi boiynsha kólikti mas kúiinde júrgizý babymen qatar, buzaqylyqqa qatysty bap zerttele kele «kisi óltirýge áreket etý» babyna aýystyryldy», - dedi Erlan Turǵymbaev.
Esterińizge salaiyq, 26 tamyzda tańǵy saǵat 5-te Almaty qalasynyń Gagarin kóshesinde arada bolǵan janjaldan keiin bir taraptyń ókilderi óz qarsylastaryn avtomobilmen qasaqana qaǵyp, qylmys ornynan boi tasalaǵan. Video áleýmettik jelide tarady.
Zardap shekkenderdiń jaǵdaiy týraly Almaty qalalyq densaýlyq saqtaý basqarmasy málim etti.
«Almaty №7 qalalyq klinikalyq aýrýhanaǵa 2 adam tústi. Birinshisine ashyq bas súiek-mi jaraqaty, midyń jeńil dárejedegi jaraqaty, bastyń oń jaq súieginiń syný diagnozy qoiyldy. Jaǵdaiy - ortasha aýyr. Ekinshi naýqasqa jabyq bas jaraqaty, midyń shaiqalý diagnozy qoiyldy. Jaǵdaiy ortasha aýyr dep baǵalanady. Úshinshisi Ortalyq qalalyq aýrýhanaǵa jetkizildi. Onyń sol aiaǵynyń tobyǵy, oń qol shyntaǵy jabyq, sol qol shyntaǵyna ashyq synǵan degen diagnoz qoiylyp otyr. Jaǵdaiy ortasha aýyr», - dep habarlady Densaýlyq saqtaý basqarmasynan.
