30 mamyr men 2 maýsym aralyǵynda «Han-shatyr» kesheni mańynda Nur-Sultan qalasy ákimdigi men QR Ulttyq sport qaýymdastyǵy birlesip tuńǵysh ret «Nur-Sultan Ethno Fest» merekesin ótkizedi.
Elorda turǵyndary men qala qonaqtary «Nur-Sultan Ethno Fest» merekesi aiasynda etno mádeni-sporttyq sharalardy, balalardyń biregei etno-attraktsiondary men merekelik kontsertterdi tamashalai alady. Sonymen qatar, etno-qalashyq alańynda sándi kiiz úiler boi kóterip, etno-jármeńke jumys isteidi.
Mereke aiasyndaǵy qyzyqtar
«Nur-Sultan Ethno Fest» merekesine kelýshiler, sheberler aýylyn aralap, qolóner buiymdary, ulttyq aspaptar kórmesi, kitap kórmesi, tarihi jáne etnikalyq jádigerler, etnobazar, sporttyq attar men qustardyń kórmesin qyzyqtaidy. Aqyndar aitysy uiymdastyrylady. Sonymen qatar, qazaq halqynyń umytyla bastaǵan qamshygerlik, tezge salý, qolqa salý, tyǵyryqqa tireý, arqan órý, qamshy órý, shańyraq kóterý sekildi ulttyq salt-dástúrleri jurtshylyq nazaryna usynylyp, olardyń shyǵý tarihy men mán-maǵynalary baiandalady. Merekelik sharaǵa qatysýshy qonaqtardyń naiza laqtyrý, qol kúres, taiaq tartys, dástúrli sadaq atý, serke kóterý baiqaýlaryna qatysyp, baqtaryn synaýǵa múmkindigi bar. Jeńimpazdarǵa baǵaly syilyqtar tartý etiledi.
Taǵy ne tamashalaisyz?
«Nur-Sultan Ethno Fest» merekesi aiasynda QR Mádeniet jáne sport ministrliginiń jyldyq kúntizbelik josparyna sáikes, at ústinde sadaq atýdan tuńǵysh Álem chempionaty ótedi. «Altyn jebe» I Álem chempionatynda dúniejúziniń jiyrmaǵa jýyq memleketiniń aitýly mergenderi baq synaidy.
Sondai-aq, 1 maýsym – Halyqaralyq balalardy qorǵaý kúni merekesine orai tuńǵysh ret etno-attraktsion ashylady. Ata-analar balalarymen birge qýyrshaq teatrynyń qoiylymdaryn tamashalap, atpen serýendep, bala kúres, aýdaryspaq, asyq atý, láńgi tebý, qappen sekirý sekildi jarystarǵa qatysa alady.
«Nur-Sultan Ethno Fest» merekesiniń saltanatty ashylý rásimi 1 maýsym, saǵat 19:00-de bastalady.
