Memleket basshysy Qasym-Jomart Toqaev «QAZAQSTAN» telearnasyna bergen suhbatynda qazirgi ómir týraly aýqymdy kitap jazatynyn aitty, dep habarlaidy QazAqparat.
«Shyǵarmashylyǵyńyzǵa qatysty taǵy bir suraq. Siz negizinen, diplomatiia, syrtqy saiasat týraly birneshe kitap jazdyńyz. Solardyń ishinde Elbasynyń tulǵasyna arnalǵan «Ol tarihty jasap jatyr» degen týyndyńyz bar. Qazirgi tańda sol kitapty jazǵanyńyzǵa ókinbeisiz be? Budan basqa, jańa kitaptar jazý josparyńyzda bar ma?», - dep suraq qoidy jýrnalist Jaina Slambek.
«Ókinbeimin. Tuńǵysh Prezidentimizdiń eńbegi týraly kitapqa kelsek, qazaqta «Ótken iske ókinbe» degen sóz bar. Men kóptegen oqiǵaǵa kýá bolǵan adammyn. Sondyqtan, qaǵazǵa túsirgendi jón kórdim. Oqyrmandardyń pikirinshe, kitaptarym joǵary deńgeide jazylǵan. Mysaly, áli kúnge deiin stýdentter meniń kitaptarymnan qajetti maǵlumatyn alyp, paidalanyp júr», - dep jaýap berdi Qasym-Jomart Toqaev.
Sonymen birge, Prezident aldaǵy josparlary týraly aityp berdi.
«Keibir oilarymdy túrtip qoiyp, kúndelik jazatynym bar. Múmkin, bolashaqta qajet bolar. Keleshekte qazirgi ómirimiz týraly aýqymdy kitap jazý oiymda bar. Amandyq bolsa jazamyn», - dedi Toqaev.
