29 qarasha men 1 jeltoqsan kúnderi Qazaqstan Respýblikasynyń Tuńǵysh prezidenti kúnin merekeleý aiasynda Almatyda «Shyǵys bazary» dástúrli Ortalyq Aziia qolóner kórme-jármeńkesi ótedi, – dep habarlaidy «Ult aqparat».
Atalǵan sharany QR Memlekettik ortalyq mýzeii jáne «Baqyt» sándik-qoldanbaly óner ortalyǵy birlesip uiymdastyrady.
Jármeńkege Qazaqstan, Qyrǵyzstan, Tájikstan, Túrikmenstan, Ózbekstan jáne Reseiden kelgen sheberlerdiń syilyq jáne kádesyi ónimderiniń keń spektri usynylady.
Qoldanbaly óner buiymdary – bul materialmen jumys isteýdiń jańa tásilderi, formalardyń, ideialardyń, oljalardyń, stilderdiń alýan túrliligi. Búginde árbir úide halyq sheberleriniń shyǵarmalary bar. Olar bizdiń ómirimizge estetikalyq sezimge jaýap beretin kórkem týyndylar retinde kiredi, aýyldyq jáne qalalyq turǵyn úilerdiń áshekeiine ainalady, - delingen habarlamada.
Jańa jyldyq mereke qarsańynda kelýshilerdiń nazaryna kiim, zergerlik buiymdar, mýzykalyq aspaptar, shyǵys miniatiýrasy, kiiz jáne jibek buiymdary, toqyma jáne toqylǵan zattar, kilemder men shamdar, amýlet jáne bylǵary buiymdar usynylady.
Sonymen qatar, jármeńke barysynda QR Tuńǵysh prezidentiniń «Uly dalanyń jeti qyry» atty maqalasy aiasynda kórkem mektepter, kolledjder men joǵary oqý oryndary arasynda «Ulttyq taqyrypta natiýrmort» atty halyqaralyq kórkem shyǵarmalar baiqaýy ótedi. Sondai-aq, mýzeige kelýshiler úshin kórkem sýret salý boiynsha sheberlik-sabaqtar uiymdastyrylady.
