Túrkistan oblysy, Túlkibas aýdanynda erekshe zárýligi bar jandardyń qatysýymen «Ómirdi súi» atty mádeni, ádebi-sazdy merekelik is-shara ótti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Saltanatty is-shara ónerli erekshe zárýligi bar jandardyń qolóner týyndylarynyń kórmesimen bastaý alyp, kontserttik baǵdarlamaǵa ulasty. Aýdan ákimi Nurlan Baiǵut qaisar jandardy arnaiy quttyqtap, qurmet kórsetti.
«Qandai qiyndyq bolmasyn tózimdilik tanytyp, moiymai, aldyǵa qoiǵan maqsattaryna nyq qadam basyp júrgen sizder – bizdiń maqtanyshymyzsyzdar. Aldaǵy ýaqytta jaqsylyqtardyń ǵana kýási bolyp júre berýlerińizge tilektespin. Barshańyzǵa zor densaýlyq, mol baqyt pen shyǵarmashylyq tabys, otbasylaryńyzǵa amandyq tileimin», – dedi aýdan basshysy.
Kontserttik baǵdarlama barysynda erekshe zárýligi bar jandar án aitý, bi bileý, ulttyq aspaptarda oinaý, ólendi mánerlep oqý syndy ónerlerin ortaǵa salyp, kópshiliktiń qoshemetine ie boldy. Aýdan ákiminiń Alǵys hatymen marapattaldy.
Búgingi tańda elimizde erekshe zárýligi bar jandarǵa memleket tarapynan erekshe basymdyq berilip, qoldaý kórsetilip keledi. 2022 jyldyń 1 qazanyndaǵy kórsetkish boiynsha Túlkibas aýdanynda múgedektigi bar 5610 turǵyn esepte turady, aýdannyń jalpy turǵyndarynyń 5%-yn qurap otyr.
Jyl basynan beri 153 muqtaj azamat 273 dana protez-ortopediialyq quraldarmen qamtyldy. 40 turǵyn sýrdotehnikalyq quraldarmen, 50 azamat tiflotehnikalyq quraldarmen, 124 azamat qol arba quraldarymen qamtylǵan. Múgedektigi bar 123 azamatqa jeke kómekshi taǵaiyndalǵan. Sanatoriia-kýrorttyq emdeýge múgedektigi bar 399 azamat joldamamen qamtylsa, zeinetkerlerge demalys úiine 531 joldama bólingen.
Aýdanda «Halyqqa áleýmettik qyzmet kórsetetin aýdandyq aýmaqtyq ortalyǵy» MM-de 18 jasqa deiingi 151 múmkindigi shekteýli múgedek balaǵa kómek berilip jatyr. Onyń ishinde 43 bala «Kúndizgi qatynaý» bólimine tasymaldanyp, bekitilgen standart negizinde áleýmettik qyzmet túrleri kórsetilip keledi. Budan bólek aýdanda ornalasqan oblystyq «Ońaltý ortalyǵynda» múmkindigi shekteýli 25 bala, «Medeý» úkimettik emes uiymynda 40 bala qyzmet alyp, tárbielenip jatyr.
