Mektep túlekteriniń bilim ordasyna, ustazdaryna syilyq berýine tyiym salynady. Bul týraly QR Bilim jáne ǵylym vitse-ministri Sholpan Karinova aitty, dep habarlaidy "Ult aqparat".
«Biylǵy oqý jylynyń bitýine, mektep sharalaryn ótkizýge bailanysty qarajat jinalmaýy qatań tártipte baqylanýy tiis. Oǵan árbir mekteptiń basshysy jeke jaýap beredi. Mekteptiń ákimshiligi jáne qamqorshylyq keńesi barlyq ata-analarmen mektepke nemese muǵalimderge, synyp jetekshilerine syilyq jasaýǵa bolmaityndyǵy jóninde jumys júrgizýi qajet», - dedi Sholpan Karinova ministrliktiń Facebook paraqshasynda onlain rejimde ótken apparat jinalysynda.
Onyń atap ótýinshe, túlekterdiń qatysýymen ótetin is-sharalar mektepte 11-synyppen jumys isteitin pedagogterdiń, synyp jetekshileriniń uiymdastyrýymen júrgizilýi qajet.
«Osy is-sharalardy ótkizý barysynda jasaýǵa bolmaityn jaittarǵa taǵy bir nazarlaryńyzdy aýdaramyz. Birinshiden, is-sharalardy ótkizý barysynda ártúrli agenttikterdi, jekemenshik stýdiialardy ne animatorlardy shaqyrýǵa bolmaidy. Mundai is-sharalar keń aýqymdy bolmaýy da qajet. Merekelik dastarqan jaiaý máselesi múldem qarastyrylmaýy tiis. Mektep bitirýshiler birneshe avtomobil jaldap, qala ishin, jergilikti jerlerdi aralamaýy kerek. Meiramhana, dámhana jáne basqa da kóńil kóterý oryndarynda túlekterdiń qatysýymen sharalar boldyrmaý úshin ata-analarmen tiisti jumysty júrgizilýi qajet», - dedi Sholpan Karinova.
