17 jastaǵy qyzyn birneshe ret zorlaǵan Aqmola turǵyny 16 jylǵa sottaldy, – dep habarlaidy Polisia.kz.
Aqmola oblysynyń qylmystyq ister jónindegi mamandandyrylǵan aýdanaralyq soty óz qyzyn birneshe ret zorlady dep aiyptalǵan Kókshetaýdyń 43 jastaǵy turǵynyna qatysty úkim shyǵardy.
"Qylmys jasaǵan kezde qyz 17 jasta bolǵan. Ákesi jasóspirimdi alǵash ret 2020 jyldyń tamyzynda qorlaǵan: týystarynan qaityp kele jatyp, er adam kólik salonynda óziniń aram oiyn iske asyrǵan. Qoryqqan qyz bul oqiǵa týraly anasyna aitpaǵan. Uialǵan. Al jazasyz qalǵan ákesi keiinnen óziniń sumdyq áreketterin taǵy eki ret qaitalaǵan. Úsh aidan keiin, qarasha aiynda qyz anasyna oqiǵa týraly aitqan, al ol politsiiaǵa habarlaǵan.
Tergeýshiler dereý QR QK-niń 120-baby 3-bóligi (Zorlaý) boiynsha sotqa deiingi is qozǵady. Tergeý aiasynda quqyq qorǵaý organdary jábirlenýshi men kúdiktiniń aiǵaqtaryn muqiiat zerttep, tekserdi. Sot-meditsinalyq jáne sot-psihologiialyq-psihiatriialyq saraptamalar júrgizdi, oqiǵa ornynda qyzdyń aiǵaqtaryn tekserý jáne naqtylaý júrgizildi" - delingen habarlamada.
Bul rette sot otyrysy barysynda sottalýshy óz kinásin jartylai moiyndaǵan, alaida tergeýshiler jinaǵan aiǵaqtar onyń sumdyq qylmys jasaǵanyn tolyq dáleldedi. Sot onyń qylmystyq jaýaptylyǵy men jazasyn jeńildetetin mán-jailardy qarastyrǵan joq.
Osylaisha, sot úkimimen aqmolalyqqa 16 jyl merzimge bas bostandyǵynan aiyrý túrindegi jaza taǵaiyndaldy. Ómir boiy pedagogikalyq laýazymdar jáne kámeletke tolmaǵandarmen jumys isteýmen bailanysty qyzmetterdi atqarýǵa tyiym salyndy. Sondai-aq qyzdyń paidasyna 3 mln teńge kóleminde moraldyq ziian ótemaqysyn óndirip alý týraly sheshim qabyldandy.
Qazirgi ýaqytta er adam bas bostandyǵynan aiyrý oryndarynda jazasyn ótep jatyr.
