Týberkýlez eki saǵatta anyqtalady. Bul týraly QR DSM «Ulttyq ftiziopýlmonologiia ortalyǵy» MM direktory Málik Ádenov baspasóz máslihaty barysynda málim etti, dep habarlaidy QazAqparat.
Mamandardyń aitýynsha, Qazaqstanda týberkýlez aýrýy boiynsha turaqty epidemiologiialyq jaǵdai baiqalady. Sońǵy 10 jylda bul dert úsh esege tómendegen: 2009 jyly bul kórsetkish 100 myń adamǵa – 105,3 bolsa, 2019 jyly 100 myń adamǵa shaqqanda – 45,6 boldy.
«2019 jyldyń qorytyndysy boiynsha dispanserlik esepte belsendi týberkýlezben 13 894 adam tur, bul 2018 jylǵa qaraǵanda 813 adamǵa az. Qazirgi ýaqytta týberkýlezben kúres 2014-2020 jyldarǵa arnalǵan keshendi jospar sheńberinde iske asyrylýda», – deidi QR DSM «Ulttyq ftiziopýlmonologiia ortalyǵy» MM direktory Málik Ádenov.
Qazaqstanda týberkýlezdiń aldyn alý, diagnostika jasaý jáne emdeý tegin. Ol memleket tarapynan qarjylandyrylady. Sondai-aq, týberkýlezdi erte anyqtaý úshin bastapqy meditsinalyq-sanitarlyq kómek (BMSK) jelisinde halyqaralyq standarttarǵa sáikes keletin diagnostikanyń eń zamanaýi ádisteri engizilgen.
«Elimizde týberkýlezben aýratyn naýqastardy emdeýdiń tiimdiligi álem boiynsha eń joǵary deńgeide. Búginde Dúniejúzilik densaýlyq saqtaý uiymy usynǵan jańa preparattar qoldanylýda. Sonyń arqasynda 2 saǵat ishinde kóptegen dárige tózimdiligi bar mikrobakteriialar men týberkýlezdi anyqtaýǵa bolady. Olardyń arasynda qysqa merzimde qurt aýrýyn emdeýge múmkindik beretin arnaiy kesteler bar», – dedi Málik Ádenov.
Resmi derek boiynsha, álemde jyl saiyn týberkýlezden 1,7 mln adam kóz jumady. Al, 10 mln-nan astam adam qurt aýrýyna shaldyǵady eken.
