Densaýlyq saqtaý ministri Aleksei Tsoi vaktsina salýǵa qarsy turǵyndar men Sanitarlyq-epidemiologiialyq baqylaý komitetiniń resmi ókili Erjan Baitanaevtyń arasyndaǵy keleńsiz oqiǵa týraly pikir bildirdi, dep habarlaidy "Ult aqparat".
Ortalyq kommýnikatsiialar qyzmetinde BAQ ókilderi Densaýlyq saqtaý ministri Aleksei Tsoiǵa antivakserler men ministrlik mamandarynyń arasyndaǵy keleńsiz oqiǵa týraly saýal qoidy. Áleýmettik jelide birneshe turǵynnyń Sanitarlyq-epidemiologiialyq baqylaý komitetiniń remi ókili Erjan Baitanaevqa qol kótergeni týraly video taraǵan bolatyn.
«Antivakserlermen kezdesýge orynbasarlaryńyz ben resmi ókilderdi jibergenshe nege ózińiz shyqpadyńyz. Olar sizdiń atyńyzdy atap shaqyrdy ǵoi. Eger siz shyqqanda mundai keleńsizdik bolmas pa edi?» - dep surady jýrnalist.
«Túsindirý jumystary barlyq satyda júrip jatyr. Vitse-ministrler de, men de halyqpen bailanysqa shyǵyp júrmiz. Bizde kimniń shyǵýǵa múmkindigi bolsa, eń aldymen sol shyǵady. Bul - qalypty protsess, burynnan jolǵa qoiylǵan. Bul jerde eshqandai suraq bolmaýy kerek.
Ol kúni de kim jaqyn mańda boldy, solar kezdesýge shyqty. Óitkeni bizdiń basqa da qatysatyn sharalarymyz bar. Departament direktorlarynan keiin ol topqa vitse-ministr de shyqty. Sol kezdesýge qatysqan mamandardyń bilim-biligi ol kisilerdiń suraqtaryna jaýap berýge jetedi dep oilaimyn. Negizinen qoiylǵan suraqtyń kóbine oidaǵydai jaýap alǵanyn ózderi de aitqan», - dedi ministr.
Ministr múmkindik bolsa, antivakserlermen jeke kezdesýge daiyn ekenin jetkizdi.
«Biz azamattardyń bárine birdei qaraimyz. Biz úshin árbir Qazaqstan azamatynyń orny birdei. Múmkindik bolsa, árqashan kezdesemiz. Árqashan kezdesýge daiynbyz. Naqty men jeke kezdesýge daiynmyn», - dedi Aleksei Tsoi.
