Densaýlyq saqtaý ministrligi sáýirde óńirlerge jetkiziletin koronavirýsqa qarsy vaktsina kólemin arttyrdy. Bul týraly densaýlyq saqtaý ministri Aleksei Tsoi málimdedi, - dep habarlaidy "Ult aqparat".
«Aǵymdaǵy epidemiologiialyq ahýaldy eskere otyryp, sáýirde Nur-Sultanǵa jetkiziletin vaktsina mólsheri 284 myń, Almatyǵa - 464 myń, Shymkentke - 172 myń, Almaty oblysyna - 232 myń, Qaraǵandy oblysyna - 217 myń dozaǵa deiin kóbeidi», - dedi Tsoi Úkimet otyrysynda.
Onyń aitýynsha, sáýirde vaktsinanyń 2 million dozasyn jetkizý kútiledi. Bul adamdardyń 23,4 paiyzyn vaktsinatsiialaýǵa múmkindik beredi. Al birinshi jartyjyldyqta 6 millionnan asa doza vaktsina alý josparlanǵan.
«Óndirýshilermen júrgizilip jatqan kelissózderdi eskere otyryp, Qazaqstanǵa birinshi jartyjyldyqta vaktsinanyń 6 mln-nan astam dozasyn jetkizý josparlanǵan. Bul vaktsinatsiialaýǵa jatatyn kontingenttiń 64 paiyzyn qamtýǵa múmkindik beredi. Atalǵan kólem KVI-ge qarsy vaktsinatsiialaýǵa jatatyn kontingentti barynsha keńeitýge jáne tegin ekpe alýǵa niet bildirgen tulǵalarǵa qoljetimdilikti qamtamasyz etýge múmkindik beredi», - dep tolyqtyrdy ministr.
Onyń atap ótýinshe, ujymdarda jáne adamdar kóp jinalatyn oryndarda vaktsinatsiialaý júrgizýge jyljymaly egý pýnkteri jumyldyrylady.
«Osyǵan orai oblystardyń, Almaty, Nur-Sultan jáne Shymkent qalalarynyń ákimderi halyqty KVI-ge qarsy vaktsinatsiialaýmen qamtýdy arttyrý úshin adamdar kóp jinalatyn jerlerde ýaqytta egý pýnkttterin/brigadalardy uiymdastyrýy; kóshpeli egý brigalaryn ekpe júrgizý úshin termokonteinerlermen jáne vaktsina saqtaýǵa arnalǵan tońazytqysh jabdyqtardyń jetkilikti sanymen qamtamasyz etýi qajet», - dedi Aleksei Tsoi.
Sondai-aq, ministr oblystar jáne Almaty, Nur-Sultan, Shymkent qalalary ákimderine halyqty vaktsinatsiialaý úshin jaǵdai jasaýdy tapsyrdy.
