Jyl sońyna deiin aqparattyq júielerdi qurý ýaqyty 6 aiǵa deiin qysqartylady. Bul týraly Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin aitty, dep habarlaidy QazAqparat.
«Memleket basshysy atap ótkendei, tsifrlandyrý boiynsha keibir salalarda kedergiler bar, máselen, geologiialyq baza, jer qoinaýyn paidalanýshylarmen qarym-qatynas, densaýlyq saqtaý salasyndaǵy qaǵazbastylyq pen biýrokratiia. Osyǵan orai, ministrlik quzyretti memlekettik organ retinde osy salalardaǵy tiisti jobalardy tehnikalyq turǵydan júzege asyrýdy óz basqarýyna alady. Jalpy búgin úsh jyldyq kelisimshart bekitý múmkindigin beretin Zań jobasyna qol qoiyldy», - dedi Mýsin Úkimet úiinde ótken otyrysta.
Sondai-aq, ministrdiń aitýynsha, jyl sońyna deiin aqparattyq júielerdi qurý ýaqyty 6 aiǵa deiin qysqartylady.
«Memlekettik organdarǵa qosymsha resýrs beretin bult infraqurylymy 2023 jyldyń ortasynda iske qosylady jáne árbir sala boiynsha tsifrlyq strategiia ázirlenip, bekitiledi. Geologiialyq bazany qurý boiynsha, Kaz-Nedra platformasy kontseptsiiasy maquldanyp, biylǵy mamyr aiynda iske asyrý tapsyryldy. Qazir 48 biznes-protsestiń reinjiniringi júrgizilip, olardy bekitý jumysy salalyq memlekettik organdarda pysyqtalyp jatyr. Tehnikalyq turǵydan iske asyrýdy óz qolymyzǵa alyp, birqatar modýlderdi, onyń ishinde jeke kabinet, interaktivti karta, litsenziialarǵa tapsyrys berý jáne t.b. qyzmetter jyl sońyna deiin qoljetimdi bolady. Al «Tsifrlyq jer qoinaýy» derekter qory 2023 jyldyń birinshi jartyjyldyǵynda iske qosylady», - dep túsindirdi Baǵdat Mýsin.
Keshe Prezident Qasym-Jomart Toqaev Tsifrlyq damý, innovatsiialar jáne aeroǵarysh ónerkásibi ministri Baǵdat Mýsinniń Ulttyq derekter bankin qurý baǵytyndaǵy jumysyna qanaǵattanbaitynyn aityp, eskertý jasaǵan edi.
