Teńgedegi salymdardy qorǵaý baǵdarlamasy qabyldandy. Bul týraly Úkimettiń keńeitilgen otyrysynda Ulttyq bank tóraǵasy Ǵalymjan Pirmatov aitty, dep habarlaidy QazAqparat.
«Biylǵy birinshi jartyjyldyqta geosaiasi jaǵdaidyń nasharlaýy saldarynan qubylmalylyq pen táýekelder artty. Osyndai jaǵdaida biz qarjy júiesiniń turaqtylyǵyn qamtamasyz etý boiynsha jedel sharalar qabyldadyq. Birinshi, naryqtarda buryn-sońdy bolmaǵan ózgeristerge toly oqiǵalar kezinde Ulttyq banktiń jedel sharalary qarjy naryǵyndaǵy jaǵdaidy turaqtandyrýǵa múmkindik berdi. Biz teńge baǵamynyń shekten tys aýytqýyn shektei otyryp, onyń infliatsiiaǵa aýysýyn tejedik. Ekinshi, qarjylyq turaqtylyqty qamtamasyz etý jáne teńgedegi aktivterdi saqtaý úshin Teńgedegi salymdardy qorǵaý baǵdarlamasy qabyldandy», - dedi Ulttyq bank tóraǵasy.
Onyń atap ótýinshe, úshinshiden, naryqtardaǵy qubylmalylyqqa qaramastan, Ulttyq qor men zeinetaqy aktivteriniń uzaq merzimdi kezeńdegi kiristiligi oń kúiinde qalyp otyr.
«Tórtinshi, biylǵy jylǵy sáýirden bastap Úkimetpen birlesken jumys aiasynda Qazaqstan Respýblikasy memlekettik baǵaly qaǵazdary FTSE Frontier EM Government Bond indeksine engizildi. JP Morgan damýshy naryqtardyń memlekettik baǵaly qaǵazdarynyń indeksine engizý úshin eldiń memlekettik baǵaly qaǵazdaryn «jiti baqylaýǵa» aldy. Besinshi, 1 shildeden bastap Ulttyq bank Lezdik tólemder júiesin jáne Tólem kartochkalarynyń bankaralyq júiesin ónerkásiptik paidalanýǵa qosty. Paidasy men shyǵasylaryn baǵalai otyryp, tsifrlyq teńgeni engizý týraly sheshim qabyldaý modeli ázirlendi», - dedi Ǵalymjan Pirmatov.
