QR Bilim jáne ǵylym vitse-ministri Rústem Biǵari bilim berý salasyn tsifrlandyrý tetikteri jóninde aityp berdi, dep habarlaidy QazAqparat.
Onyń aitýynsha, Qazaqstannyń bilim berý júiesinde 20 myńnan astam uiym, 7 myń mektep, 860 kolledj jáne 130-dan astam JOO bar.
«Tsifrlyq Qazaqstan» baǵdarlamasy aiasynda bilim berý salasyn tsifrlandyrý jumystaryn bastadyq. Mektepterde elektrondy jýrnal, elektrondy kúndelik syndy túrli júieler paida boldy. Kásipkerler men startapshylar úshin de múmkindik kóp. «Tsifrlyq Qazaqstan» baǵdarlamasyna deiin tsifrlyq tehnologiialardy engizý - kompiýterlik qurylǵylardy ornatý dep qabyldanatyn. Shyn máninde, tsifrlyq tehnologiialardy engizý – úlken eńbek», - dedi Rústem Biǵari búgin Astana Hub tehnoparkinde áleýmettik innovatsiialar zerthanasynyń ashylýynda.
Vitse-ministr elimizde Ulttyq bilim berý derekter qorynyń jumys isteitinin jáne mektepterge virtýaldy shyndyq jobalarynyń engizilip jatqanyn habarlady.
«Mektepterde júzege asyrylýy tiis jobalar kóp. Robototehnika kabinetteri, STEM-zerthanalar aiasynda virtýaldy shyndyq jobalary engizilip jatyr. Qazaqstannyń bilim berý júiesiniń ózi standarttardy júzege asyrýǵa negizdelgen. Bilim berý júiesinde memlekettik bilim berý standarttary uǵymy bar. Iaǵni, kez kelgen oqýlyqqa saraptama júrgiziledi. Al virtýaldy shyndyq, zerthana synyptary ázirge qosymsha bilim berý júiesi retinde engizilip jatyr. Osyǵan bailanysty, jańa tehnologiialarǵa esh kedergi joq», - dedi ol.
Aita keteiik, Astana Hub halyqaralyq IT-startaptar tehnoparki men BUU Balalar qory (IýNISEF) balalar múddesin qorǵaityn «Social Innovation» áleýmettik innovatsiialar zerthanasyn ashty. Onyń qyzmeti zamanaýi tehnologiialar arqyly balalardy túrli syn-qaterden qorǵaityn jobalardy júzege asyrýǵa baǵyttalǵan.
