2018 jyldyń jazynda elimizde tuńǵysh ret «Tsifrlyq Qazaqstan» baǵdarlamasy iske qosylǵaly otyr. Elbasy N.Á.Nazarbaev 10 qańtarda Qazaqstan halqyna arnaǵan Joldaýynda «Tsifrlyq Qazaqstan» keshendi baǵdarlamasy qabyldandy. Qazaqstan Respýblikasynyń 2025 jylǵa deiingi damýynyń keshendi strategiialyq jospary jasaldy dep basa mán berdi.
Elbasynyń bul jobaǵa erekshe mán berip, atap ótetindeii de bar, IT qaryshtap damyp, aqparat almasý kúnige túrlenip otyrǵan qazirgidei zamanda sandyq tehnologiialardy damytpasaq, álemniń aldyńǵy qatarly 30 eliniń qatarynan kóriný qiial bolyp qalary anyq. Sebebi, qazirgi kezeńde kóshbasshy elderdiń barlyǵy sandyq júiege kóship, ekonomikasynyń damýyna hám halqynyń ál-aýqatynyń jaqsarýyna sep bolyp otyr.
Dál osy Joldaýdan soń, bir aptadan soń, «Tsifrlyq Qazaqstan» baǵdarlamasyna jaýapty basty ministrliktiń basshysy Dáýren Abaev vedomstvanyń alqa májilisinde bul baǵdarlamanyń iske asyrylatyn negizgi 5 baǵytyn aitqan edi.
2025 jylǵa deiin jekemenshik jáne memlekettik investitsiiany 5 ese qylyp qaitarý maqsatynda qosymsha 2 trln teńgeni quraityn qosymsha qun óndirip alýǵa múmkindik bergeli otyrǵan tsifrly ekonomikanyń keleshegi zor.
QR Aqparat jáne kommýnikatsiialar ministri D.Abaevtyń sózinshe joǵaryda biz jazǵan baǵdarlama kelesidei baǵyttar boiynsha júzege asady:
- Ekonomika salasynda tsifrlyq tehnologiiany belsendi túrde engizý;
- Memlekettik qyzmetterdi tsifrlandyrý;
- El boiynsha joǵary jyldamdyqpen jumys isteitin internet qosý;
- Turǵyndar men bizneske tsifrlyq daǵdylardy úiretý;
- Startaptar men kásipkerlikti qoldaý otyryp, innovatsiiany damytý jaǵdaiyn jasaý.
Ashyq derek kózderine súiene otyryp, qarapaiym tilmen jetkizer bolsaq, bul baǵdarlamanyń basty maqsaty – qazaqstandyqtardyń ómir sapasyn arttyryp, ulttyq ekonomikany tsifrlandyrý. Qujattardy júzege asyrý sheńberinde 2020 jylǵa deiin ǵalamtor qoldanýshylarynyń sanyn 80 paiyzǵa deiin arttyryp, el turǵyndarynyń 95 paiyzyn tsifrlyq xabar taratýmen qamtamasyz etý, azamattardyń tsifrlyq saýattylyǵyn 80 paiyzǵa deiin jetkizý kózdelýde.
Eń bir qyzyǵy – atqarylatyn jobalardyń basym bóligi memlekettik-jekmenshik seriktestigi (GChP) aiasynda júzege aspaq. Bul elimizdegi shaǵyn jáne orta biznestiń damýyna jáne syrttan keler investorlardyń artýyna septigin tigizeri daýsyz.
Al sarapshylardyń aldyn ala jasaǵan boljamy boiynsha, 2025 jyldan bastap, IJÓ ósiminen tsifrlandyrý jobalaryn iske asyrýdyń jiyntyq áseri 30 paiyzǵa deiin jetedi; 2018-2022 jyldar aralyǵynda 300 myń jańa jumys ornyn ashý josparda.
«Tsifrlyq Qazaqstan» baǵdarlamasynyń negizin biyl qurylǵanyna 10 jyl tolǵaly otyrǵan «Zerde» Ulttyq infokommýnikatsiia holdinginiń bazasynda ázirlengen bolatyn.
Osy oraida, Qazaqstanda aqparattyq tehnologiialardy memlekettik sektorǵa engizý sharalary osydan 10 jyl buryn sátti bastalǵanyn aita ketý qajet. Dál osy jerdegi bultartpas mysal, ol – eGov nemese Qazaqstannyń elektrondy Úkimeti. Dál osy Ońtústik Koreia úlgisinde jasalǵan júie kómegimen júzdegen operatsiialardy eshqaida barmai-aq kompiýter aldynda otyryp júrgize alasyz. Mundai jobanyń TMD elderinde biren-saran ekenin eske salý esh artyq bolmas. Qujat rásimdeý, túrli anyqtamalar alý, kommýnaldyq qyzmet túrleriniń aqysyn, salyqty, aiyppuldy, saqtandyrýdy jáne ózge de qyzmet túrlerin úide otyryp tóleýge kez-kelgen azamattyń múmkindigi bar. Al, «Tsifrlyq Qazaqstan» baǵdarlamasy aiasynda bul júieniń jumysy odan ári jetildirilmek. Jetildirý úshin birqatar damyǵan memleketterdiń tájiribesi qabyldanbaq. Osy baǵytta el Úkimeti birqatar keshendi jumystardy júzege asyryp, alys-jaqyn sheteldiń aldyńǵy qatarly IT kompaniialarymen, biznes ókilderimen kelissózder júrgizip otyr.
Jalpy aitqanda munyń bári el azamattarynyń ál-aýqatyn jaqsartyp, eńsesin tik kóterýge jasalyp jatqan jumystar ekenin túsinip, múmkindiginshe qoldaý tanytýymyz qajet. Turǵyndardyń turmys-tirshiligi jaqsaryp, basy artyq qaǵazbastylyq pen biýrokratiiadan arylǵanda ǵana Qazaqstanymyz damyǵan 30 eldiń ortasynan oryn alary anyq. Al bul maqsattarǵa jetýimiz úshin turǵyndarymyz sandyq bilimdi meilinshe meńgerýi tiis.
