QR Densaýlyq saqtaý vitse-ministri Oljas Ábishev elimizde naýqastardyń qupiiasy kibershabýyldar men hakerlerden qalai qorǵalatyny týraly aitty.
«Tsifrlandyrýǵa deiin ambýlatoriialyq kartalar men jazbalar qaǵaz túrinde boldy. Ol kezde meditsinalyq málimetterdiń saqtalýyna eshkim kepildik bergen joq. Máselen kez kelgen eden jýýshy, tehnikalyq maman málimetterge qol jetkizip, dárigerdiń jazbasymen tanysa alatyn edi. Tipti sýretke de túsirip alýǵa múmkindik boldy. Meditsinalyq derekter qaǵaz júzinde júrgizilgende aqparat qoljetimdi boldy. Biraq tsifrlandyrý úderisi bastalǵaly meditsinalyq málimetterdiń qaýipsizdigi standarty 99,6% shamasynda saqtalýda», - dep túsindirdi Oljas Ábishev Ortalyq kommýnikatsiialar qyzmetinde ótken baspasóz máslihatynda.
Vitse-ministrdiń aitýynsha, departament Ulttyq qaýipsizdik komitetimen (UQK) birge qaýipsizdikti qamtamasyz etedi.
«Biz ai saiyn óz qurylymdarymyz ishinde, sondai-aq aqparattyq qaýipsizdik boiynsha syrtqy ýákiletti organdardan tekserýden ótemiz. Kez kelgen meditsina qyzmetkeri óziniń qyzmetin paidalana otyryp, aqparattyq júielerdi paidalanýǵa, syrttan málimet qosýǵa jáne kóshirýge quqyǵy joq ekenin aitqym keledi. Ol óziniń kásibi qyzmeti sheńberinde kórsetilgen meditsinalyq qyzmetter týraly derekterdi ǵana engize alady. Derekterdi fleshkaǵa basyp shyǵarý jáne kóshirý áreketi olardyń qyzmetine kirmeidi», - dep atap ótti vitse-ministr.
Sondai-aq naýqas qaǵaz túrindegi aýrý tarihyn tek óz suranysy boiynsha ǵana ala alady. Taǵy bir aita keterligi, Densaýlyq saqtaý ministrligi patsientke sms-habarlama arqyly aqparat jiberý múmkindigine ie.
Oljas Ábishev atap ótkendei, meditsina salasyn tsifrlandyrý qolǵa alynǵannan beri densaýlyq saqtaý júiesinde meditsinalyq derekterdiń joiylyp ketý faktisi tirkelmegen.
