Transshekaralyq ózender salasyndaǵy Qazaqstannyń kelissóz komissiialaryna erekshe mártebe berý máselesi qarastyrylýda. Bul jaiynda QR Premer-Ministri Asqar Maminniń Senat depýtattarynyń saýalyna bergen jaýabynda aitylǵan, dep habarlaidy "Ult aqparat".
«Qazirgi ýaqytta respýblikalyq menshiktegi sý sharýashylyǵy qurylystaryn basqarý jáne paidalanýdyń jetkilikti tetigi jasalǵan. Ol «Qazaqstan Respýblikasynyń Úkimeti týraly» Konstitýtsiialyq zańynda anyqtalǵan. Sondai-aq ýákiletti organnyń qyzmetine baqylaý jasaýdy qamtamasyz etedi. Jańa Ekologiialyq kodekstiń (budan ári – Ekokodeks) redaktsiiasyna keshendi ekologiialyq ruqsat (budan ári – ruqsat) retinde qural engiziledi. Ruqsat eń úzdik qoljetimdi tehnikalardy qoldaný esebimen beriledi. Ol bárinen buryn sýdy tutyný deńgeiin tómendetýdi nemese ekologiialyq tiimdilikti kóterý baǵdarlamasyn berýdi usynady» , - dedi Asqar Mamin.
Premer-Ministrdiń atap ótýinshe, sý qorynyń jerleri sheginde, sondai-aq aýyz sýmen jabdyqtaý úshin paidalanylatyn nemese paidalanylýy múmkin jer asty sýlarynyń ýchaskelerinde jáne ken oryndary kontýrlarynda jer qoinaýyn paidalaný boiynsha operatsiialardy ótkizýge tyiym salý Sý kodeksiniń 120, 125-baptarynda jáne Jer qoinaýy jáne jer qoinaýyn paidalaný kodeksiniń 25-babynda qarastyrylǵan.
«Osyǵan sáikes Ekokodekstiń jańa redaktsiiasynda kórsetilgen tyiymǵa kiretin ýchaskeler úshin ekologiialyq talaptar kózdelgen. Sý únemdeý tehnologiialaryn engizý, biýdjet qarajatyn tiimsiz josparlaý men paidalaný úshin, sondai-aq eldiń sý qaýipsizdigine qarsy qylmystar úshin jaýapkershilikti kúsheitý jáne transshekaralyq ózender salasyndaǵy Qazaqstannyń kelissóz komissiialaryna erekshe mártebe berý máseleleri de zańnamany jetildirý aiasynda qarastyrylady. Sondai-aq memlekettik baǵdarlamada eskeriletin bolady», - dedi Úkimet basshysy.
