Transshekaralyq ózenderde sýdy ádil bólý úshin kórshi eldermen yntymaqtastyqty nyǵaitý kerek. QR Ekologiia, geologiia jáne tabiǵi resýrstar ministri Maǵzum Myrzaǵaliev osylai dedi, dep habarlaidy QazAqparat.
«Sý resýrstaryn basqarý salasyna bailanysty myna máselelerge nazarlaryńyzdy aýdarǵym keledi. Birinshiden, transshekaralyq ózenderdegi sý deńgeiiniń azaiý qaýpi bar. Ortasha kóp jyldyq sý aǵyny 100 tekshe shaqyrymdy quraidy. Onyń ishinde 44 paiyzy kórshi elderden keledi. Sý tapshylyǵyn boldyrmaý úshin bizge Qytaidan aǵatyn transshekaralyq ózenderde sý bólýdi ádil jáne ózara tiimdi kelisim quryp, sondai-aq Ortalyq Aziia elderimen (Ózbekstan, Qyrǵyzstan, Tájikstan) jáne Resei Federatsiiasymen eki jaqty yntymaqtastyqty nyǵaitý kerek», - dedi ministr OKQ-da ótken baspasóz máslihatynda.
Onyń aitýynsha, tiisti eki jaqty komissiialar jumys istep, kelissózder turaqty negizde júrgizilýde.
«Ysyrap bop jatqan sý mólsherin azaitý úshin arnalardy jóndeý jáne sý resýrstaryn avtomatty túrde basqarýdy engizý talap etiledi. Osylai, egiske deiin tasymaldaý kezinde sý ysyrabyn azaitý maqsatynda gidromeliorativtik júielerdi qaita qurý is-sharalary belsendi túrde júrgizilýde», - dedi ol.
Maǵzum Myrzaǵaliev elimizdegi ishki jáne syrtqy sý qaýipsizdigin eskere otyryp, sý resýrstaryn basqarýdyń 2020-2030 jyldarǵa arnalǵan memlekettik baǵdarlamasyn jáne sý salasyn tsifrlandyrý tujyrymdamasyn ázirleý jumysy bastalǵanyn aitady. Baǵdarlamany kelesi jyly bekitý josparlanyp otyr.
