Alǵash ret Sian (Qytai) - Izmit (Túrkiia) baǵytyndaǵy konteinerlik poiyz Qazaqstan arqyly Transkaspii halyqaralyq kólik baǵytymen (THKB) júrip ótti. Bul týraly «QTJ» kompaniiasy baspasóz qyzmetinen málim boldy, dep habarlaidy "Ult aqparat".
Poiyz Respýblika aýmaǵyna Altynkól shekara beketi arqyly keldi. Keiin poiyz THKB baǵdarymen júk Aqtaý portyna ótip, Baký portyna fiderlik kememen, odan ári Ázerbaijan men Grýziia aýmaqtary arqyly Túrkiiaǵa jetkiziledi.
Ártúrli tutyný taýarlary tielgen 41 qyryqfýttyq konteinerlerden turatyn poiyz jóneltý pýnktinen mejeli jerge deiingi qashyqtyqty 16 kún ishinde júrip ótedi.
«Tranzittik bailanysta 2020 jyldyń úsh aiynda Transkaspii baǵyty arqyly 1,1 myń JFE (jiyrmafýttyq ekvivalent) tasymaldandy», - dedi «KTZ Express» AQ Bas direktory Dmitrii Abdýllaev.
Onyń aitýynsha, marshrýt qazaqstandyq eksporttaýshylarǵa óz ónimderin Ázerbaijanǵa, Grýziiaǵa, Túrkiiaǵa, sondai-aq Qara jáne Jerorta teńizderiniń porttaryna jetkizýge múmkindik beredi, sonymen qatar kompaniia qolaily tariftik jaǵdailardy jasaý men transqazaqstandyq baǵytqa júk kólemin tartý boiynsha turaqty jumys isteidi.
