AQSh Prezidenti Tramp Ýkraina Prezidenti Zelenskiimen aradaǵy shilde aiyndaǵy telefon áńgimesi jaily ókilder palatasyna aqparat berip, shaǵym túsirgen arnaiy qyzmet ókiliniń aty-jónin ataýdy surady. Osy shaǵymnan keiin AQSh Kongresi Trampqa impichment jariialaý máselesi boiynsha zertteý bastaǵan edi.
Jeksenbi kúni jýrnalistermen sóilesken Tramp shyndyqqa sai kelmeitin aqparat bergen bul adam - "Ortalyq barlaý basqarmasynyń burynǵy direktory Brennannyń jáne "Trampty jekkóretin" burynǵy prezident Barak Obamanyń adamy bolýy múmkin" dep sanaidy.
Aqparat bergen adamnyń aty-jónin jariialaý qajettigi jaily Tramp tvitterinde de jazǵan.
Prezident Tramp Ýkraina Prezidenti Zelenskiimen áńgimesi burmalanǵanyn, ol Ýkraina basshysyna qysym jasamaǵanyn, AQSh joǵary laýazymdy adamdarynyń qatysy bolýy múmkin jemqorlyq isti tekserýdi ǵana suraǵanyn aitady. Aq úi jariialaǵan telefon áńgimesinde "jemqorlyq tekserilmese, Ýkrainaǵa beriletin áskeri kómek kidirtiletini" jaily sóz bolmaǵan. Alaida ókilder palatasynda suralǵan birqatar sheneýnikter "Ýkrainany Tramp shartyn oryndaýǵa májbúrleý úshin áskeri kómek kidirtildi" degen boljamdy rastaidy.
Tramp pen Zelenskiidiń telefon áńgimesi jaily aqparat bergen adamnyń advokaty jeksenbi kúni onyń respýblikashyldar, Tramp partiialastary aldynda – kongreste jaýap berýge daiyn ekenin málimdedi. Alaida advokat qaýipsizdik maqsatynda aqparat berýshi adamnyń aty-jónin jariialaýǵa bolmaityn aitty.
