Resei prezidenti Vladimir Pýtinmen telefon arqyly sóilesken AQSh prezidenti Donald Tramp orman órtin sóndirýde qol ushyn berýge daiyn ekenin jetkizdi. Bul týraly Kreml baspasóz qyzmetine silteme jasaǵan "RIA Novosti" habarlady. Aqparatqa qaraǵanda áńgimelesýge Aq úi niet bildirgen.
Pýtin Trampqa alǵys aityp, kómek qajet bolyp jatsa ǵana ótinishin qabyldaitynyn aitqan. Aqparatqa qaraǵanda, Pýtin AQSh-tyń bul usynysyn eki el arasyndaǵy qarym-qatynastyń qaita qalpyna kelýi dep baǵalaǵan.
Amerika jaǵy prezidentterdiń bul áńgimesine bailanysty ázirge túsinikteme bermedi.
Pýtin sársenbi, 31 shildede Sibirdegi órtti sóndirýge qorǵanys ministrliginiń de atsalysýyn tapsyrǵan. Birneshe kún buryn Krasnoiarsk ólkesiniń gýbernatory Aleksandr Ýss Sibirdegi orman órtin sóndirýge bilik nelikten asyqpai otyrǵanyn túsindirgen.
"Bul ádettegi jaǵdai, onymen kúresý beker, al kei jerde tipti ziiany tiiýi de múmkin" degen edi sheneýnik.
Krasnoiar ólkesi, Irkýtsk oblysy, Býriatiia men Iakýtiianyń úlken aimaǵynda orman órti áli basylmady. Sońǵy aqparatqa qaraǵanda birneshe aptadan berip janyp jatqan ormannyń aýmaǵy úsh million gektardan asqan. Órtten shyqqan kók tútin Povolje men Qazaqstan shekarasyna da jetken.
Batys aqparat quraldary Reseidegi bul órtti buryn sońdy bolmaǵan oqiǵa dep otyr.
