Saýd Arabiiasy OPEK-tiń shuǵyl jiynyn ótkizgisi keletini týraly aqparat taraǵan shaqta juma kúni tańerteń halyqaralyq naryqta munai baǵasy qymbattady dep jazdy "Interfaks" agenttigi. London birjasynda Brent markaly munaidyń baǵasy barreline 28,9 dollardy qurady. Bul aldyńǵy sessiiamen salystyrǵanda shamamen 17 paiyzǵa joǵary.
Donald Tramp málimdemesinen keiin beisenbi kúni halyqaralyq naryqta munai baǵasy 36 dollarǵa deiin kúrt sharyqtap, keiinirek qaita tómen túsken. Tramp Twitter-de Saýd Arabiiasynyń taq murageri Muhammed bin Salmanmen sóileskenin jazdy. Aq úi basshysynyń sózine qaraǵanda hanzada men Resei prezidenti Vladimir Pýtin munaiǵa bailanysty kelissóz júrgizgen.
Tramp taraptar kúnine 10-15 mln barrelge deiin munai óndirýdi azaitatyn shyǵar dep úmittenetinin jetkizgen. Saýd Arabiiasy 1 sáýirden bastap táýligine - 12 mln barrel, Resei 11,5 mln barrel óndirýdi josparlaǵan edi.
Kreml Pýtinniń Er-Riiadpen kelissóz júrgizgenin joqqa shyǵardy.
30 naýryzda Vashington Máskeý men Er-Riiad munai baǵasynyń quldilaýyn toqtatý maqsatynda kelissóz júrgizedi dep málimdegen bolatyn. Aq úi basshysy Resei prezidenti Vladimir Pýtin jáne Saýd Arabiiasynyń taq muragerimen telefon áńgimede osy máseleni qozǵaǵan. Degenmen shikizat qunynyń arzandaýyn toqtatý úshin qandai shara qoldanylatyny aitylǵan joq.
Bloomberg agenttigi jaqynda Resei 1 sáýirden bastap OPEK-tiń shekteý sharalarynyń merzimi ótkennen keiin munai óndirisin ósirmeitinin habarlaǵan. Derekkóziniń aitýynsha, bul Saýd Arabiiasymen bitimge kelgendiginiń belgisi bolýy múmkin.
Naýryz aiynyń basynda Máskeý men Er-Riiad shikizat óndirisin azaitý týraly kelise almaǵannan keiin halyqaralyq naryqta munai baǵasy kúrt arzandaǵan edi.
