Foto: New York Times
AQSh prezidenti Donald Tramp Irandaǵy bilikke qatysty ótkir málimdeme jasap, el ishinde basqarý daǵdarysy bar ekenin aitty, dep habarlaidy Ult.kz.
Onyń sózinshe, irandyqtar "abdyrap qalǵan", sebebi:
"Olar el atynan naqty kim sóilei alatynyn túsinbei otyr. Ózderiniń kóshbasshysy kim ekenin de bilmeidi".
Tramp sondai-aq AQSh "Irandaǵy birneshe deńgeidegi jetekshilerdi is júzinde alyp tastaǵanyn" jáne Ali Hamenei ainalasyndaǵy adamdarǵa da soqqy berilgenin meńzedi.
Ol Iran biligi endi burynǵydai yqpaldy emes ekenin atap ótti:
"Olarǵa eshkim kómekteskisi kelmeidi, óitkeni olar endi qorqynysh týdyrmaidy jáne Taiaý Shyǵystyń “qorqytýshy kúshi” emes".
Sonymen qatar, The New York Times deregine súiensek, Irannyń jańa joǵarǵy kóshbasshysy retinde atalyp júrgen Modjtaba Hamenei birneshe aýyr operatsiiadan ótken. Basylym málimetinshe:
- – onyń bir aiaǵyna úsh ret ota jasalǵan, protez qajet bolýy múmkin
– bir qolyna da operatsiia jasalǵan, qazir qalpyna kelý protsesinde
– beti men erni qatty kúiip, sóileýi qiyndaǵan
Sondai-aq, gazet birneshe derekkózge súienip, Hamenei "kem degende ázirge" sheshim qabyldaýdy Islam revoliýtsiiasy saqshylary korpýsyndaǵy generaldarǵa tapsyrǵanyn jazady.
Qysqasy: Irandaǵy bilik qurylymy týraly qarama-qaishy aqparat kóbeiip, jaǵdaidyń qanshalyq turaqty ekeni suraq týdyryp otyr.
