AQSh prezidenti Donald Tramp Twitter-de "Antifa" qozǵalysyn terroristik uiymdar tizimine kiretinin málimdedi.
Aq úi eldi sharlap ketken narazylyq sherýler barysyndaǵy tártip buzý áreketteri úshin qozǵalysty aiyptap otyr.
Narazylyq aktsiialary Minnesota shtaty Minneapolis qalasynyń 46 jastaǵy afroamerikalyq turǵyny Djordj Floidtyń 25 mamyr kúni politsei qolynan qaza tabýynan keiin bastaldy. Jergilikti politsei Derek Shovin qoly kisendelip, jerde jatqan Floidtyń moinyna tizesimen otyrǵan. Tunshyqqan Floidtyń "Dem ala almai jatyrmyn" deýi videoǵa túsken. Floid artynsha aýrýhanaǵa túsip, reanimatsiiada kóz jumǵan. Amerikalyqtar politseidiń mundai áreketi Floidtyń násiline bailanysty dep jappai sherýge shyqty. Sherýler AQSh-tyń ózge qalalaryna tarap, áli toqtamady. CNN telearnasynyń málimetinshe, dál qazir kemi 40 qalada komendant saǵaty engizilgen. Sherýshiler 46 jastaǵy afroamerikalyq azamattyń ólimine qatysy bar tórt politseidi sottaýdy talap etip jatyr.
Narazylar kólikter men dúkenderdi órtep, jergilikti politsiia ǵimaratyna órt qoidy.
Reuters agenttiginiń habarlaýynsha, narazylardyń arasynda "Antifa" qozǵalysynyń qansha múshesi ia jaqtasy bary ázirge belgisiz. Minnesota shtatynyń qoǵamdyq qaýipsizdik departamentiniń jetekshisi Djon Harringtonnyń málimdeýinshe, senbi kúni qamaýǵa alynǵan narazylardyń 20 paiyzy Minnesotaǵa ózge shtattardan kelgen. Harringtonnyń sózinshe, senbiden jeksenbige qaraǵan túni qamaýǵa alynǵandardyń tolyq tizimi áli jasalmaǵan.
Tramp "Antifa" qozǵalysyn buǵan deiin de terroristik uiymmen bailanystyrǵan. Tehas senatory Ted Krýz siiaqty ózge de konservator saiasatkerler de osyǵan uqsas málimdeme jasaǵan.
Ázirge Tramp ákimshiligi "Antifa" qozǵalysyn "terroristik" dep tanýǵa qanshalyqty kiriskeni belgisiz. Eger shynymen bul máseleni qolǵa alsa prezident ákimshiligine birqatar federaldy agenttikter arasyndaǵy úilestirýdi qajet etetin uzaq protsedýralardan ótýi tiis, deidi Reuters.
