Donald Tramp Qytai Soltúsik Koreianyń iadrolyq baǵdarlamasyna qatysty qatań saiasat ustana almasa, AQSh onymen ózi ainalysýǵa daiyn ekenin málimdedi. Bul týraly ol 2 sáýirde Financial Times basylymyna bergen suhbatynda aitty.
Tramp 6-7 sáýirde Florida shtatyndaǵy Mar-a-Lago rezidentsiiasynda Qytai prezidenti Si Tszinpinmen kezdesedi.
"Qytai Soltústik Koreiaǵa yqpal ete alady jáne Pekin bizdiń Soltústik Koreianyń iadrolyq baǵdarlamasy máselesin retteýge kómektesý, ia kómektespeý týraly bir toqtamǵa kelýi kerek. Eger kómektesse, onda ol Qytaidyń ózi úshin óte jaqsy bolmaq" dedi AQSh prezidenti.
Tramp AQSh-tyń Soltústik Koreia máselesin Qytaidyń aralasýynsyz ózi-aq rettei alatynyn da málimdedi.
"Soltústik Koreia máselesin qalai rettemeksiz" degen suraqqa Tramp "Ony sizge aitpaimyn. Meniń sizge Taiaý Shyǵysta qai jerde soqqy jasaǵaly jatqanymdy aldyn ala aityp qoiatyn burynǵy AQSh emes ekenimdi bilesiz" dep jaýap berdi.
Tramp pen Tszinpin Korei túbegindegi jaǵdaimen qosa, birqarat kúrdeli máseleni talqylaidy degen boljam bar. Sonymen qatar kún tártibinde Ońtústik Qytai teńizindegi territoriialyq daý men saýda máseleleri qaralmaq.
Tramp prezident sailaýy kampaniiasynda Qytaidy ádiletsiz saýda-sattyq saiasatyn júrgizip otyr dep aiyptap, qytai taýarlaryna importtyq salyqtyń kóbeitiletinin málimdegen edi.
