Slavian bazary qazylar alqasynyń múshesi, QR halyq ártisi Roza Rymbaeva Ámre-niń baiqaýǵa qatysqany týraly áńgimelep berdi jáne ánshiniń mansabyn qalai damytýǵa bolatyny jaily óz pikirin bólisti, - dep habarlaidy Tengrinews.kz tilshisi.
Rymbaevanyń aitýynsha, Halyqaralyq "Slavian bazary" baiqaýynyń qatysýshy sany men geografiiasy keńeigen. Biyl saiysqa 21 ónerpaz qatysqan.
"Tyńdalymnyń birinshi kúninen-aq baiqaýdyń favoritteri anyqtaldy. Biz olardan ekinshi kúni jeńiske laiyqty óner kórsetýin kúttik. Baiqaý basynda jaqsy sahnalyq kórsetilimimen kózge túskender ekinshi kúni oidan shyqpady, sebebi týrda orys tilinde án aitý kerek boldy. Orys tilinde áriptiń dybystalýy óte qiyn. Kóbi osy orys tildi ánnen shalyndy. Biraq favoritter báribir óz ornynda qaldy", - dedi Roza Rymbaeva.
Úshinshi kúni baiqaýdyń tańdaýlylary arasynda rýmyn oryndaýshysy, qazaqstandyq Ámre jáne Belarýs ókili bolǵan. Biraq buǵan deiin qazylar alqasy jii synǵa alyp júrgen ýkrain ánshisi kútpegen jerden bul qatarǵa qosylyp ketti.
"Upai boiynsha Qazaqstan men Rýmyniia alda bolǵan, ekeýiniń kórsetkishi birdei bolyp shyqty. Mundai jaǵdaida qazylar alqasynyń tóraǵasy upai qosyp, jeńimpazdy anyqtai alady. Baiqaýda solai boldy. Bizde kóp salǵylasý boldy. Árine men ózimizdiń ánshiniń jaǵdaiyna ýaiymdadym, kóp daýlastym, Bas júldeni ekige bólýdi suradym. Keibireýleri meni qoldady, biraq baiqaý uiymdastyrýshylary olai jasaýǵa bolmaitynyn aitty. Nátijesinde qazylar alqasy tóraǵasy rýmyn oryndaýshysyna upai qosty, al Ámre birinshi oryn ielendi", - dedi qazaqstandyq ártis.
Onyń aitýynsha, qazylar alqasy Ámre-niń áli jas ekenin jáne ony alda kóp baiqaý kútip turǵanyn, sonyń ishinde kelesi jyly da "Slavian bazaryna" qatysa alatynyn basty nazarǵa ala otyryp, sheshim qabyldaǵyn.
"Kóp jyly sózder men bizdiń ánshiniń bolashaǵy zor jáne áli deńgeiin kóterýge ýaqyty bar ekeni aityldy. Bul shyndyq. Meniń oiymsha, Qazaqstandaǵy barlyq jas oryndaýshynyń ishinde Dimash Qudaibergen - jańa qubylys, mýzykamyzdyń fenomeni. Al Ámre Dimashtan keiin ekinshi orynda. Sebebi Ámre óner jolyna endi qadam basyp jatyr, al Dimashtyń bul turǵyda tájiribesi mol. Ámre-ge repertýaryn tolyqtyryp, kórermen kózin kóbirek kontsert berip, jańa, jaqsy hitterimen qýantý kerek. Biraq toi ánimen emes. Ony toi ártisterimen salystyrmaý úshin, ózin joǵary deńgeide ustaýy kerek", - deidi Roza Rymbaeva.
Eske sala keteiik, Ámre laqap atymen óner kórsetetin qazaqstandyq ánshi Ernar Sadyrbaev halyqaralyq estrada ánshileriniń arasynda ótetin "Slavian bazary" baiqaýynda birinshi oryn ielendi.
