Elde qalyptasqan jaǵdaiǵa bailanysty Qazaqstannyń ziialy qaýym ókilderi el turǵyndaryna úndeý joldady. Olardyń arasynda qazaq jazýshysy jáne kinodramatýrg, Qazaqstan Jazýshylar odaǵynyń múshesi, Qazaqstannyń eńbek sińirgen qairatkeri Smaǵul Elýbai, akter, teatr jáne kino rejisseri Asanáli Áshimov, aqyn, Qazaqstan Jazýshylar odaǵynyń tóraǵasy Ulyqbek Esdáýlet bar, dep habarlaidy "Ult aqparat".
«Buryn-sońdy bolmaǵan osyndai náýbet kezinde birigeiik. Birlesip jumys isteiik, bir-birimizdi tyńdaiyq. Joǵarydan berilip jatqan málimetterdi oryndaiyq. Qart býynǵa men senem, olardyń tártibine senemin. Men mynaý jastarǵa kóńil aýdaryp otyrmyn. Qalai bolsa solai júrip, maskasyz júrip, toi-jiyn jasaýdy doǵarý kerek ýaqytsha. Toilaityn ýaqyt alda», - degen Asanáli Áshimov el osynaý kúrdeli jaǵdaidan shyqqanda qýanyshty sátterdi atap ótetin kezder kóp bolatynyn atap ótti.
«Barlyǵy adamnyń aqylyna bailanysty. Memleketimizdiń bailyǵy – halyq. Halyq bailyǵy – el bailyǵy. Sondyqtan árqaisymyz bir-birimizge adal bolaiyq, ár ýaqytta bir-birimizge qorǵanysh bolaiyq. Saqtaiyq bir-birimizdi, ol úshin tártip kerek. Osyny qolǵa alaiyq», - dep úndeý tastady Asanáli Áshimov.
Óz kezeginde aqyn, Qazaqstan Memlekettik syilyǵynyń iegeri Ulyqbek Esdáýlet te qala turǵyndarynan epidemiologiialyq talaptardy saqtap, óz densaýlyqtaryna bei-jai qaramaýǵa shaqyrdy.
«Álemdi titirentken koronavirýs indeti bizdiń halqymyzǵa da qyrǵidai tiip, shetinen baýdai túsirip jatyr. Kúnde estitiniń qaraly habar, azaly sózder. Halqymyzdyń nebir atpal, abzal azamattary, qairatker tulǵalary, daryndy, talantty adamdary beimezgil dúnieden ótip jatyr. Qaraly shańyraqtar, azaly otbasylar kúnnen kúnge kóbeiip bara jatyr. Sondyqtan biz saqtyq sharalaryn qaitadan kúsheitýimiz kerek, biz endi bulai qarap otyra berip, shybynsha qyryla berýge bolmaidy. Meditsinany memleket qolyna alyp, bárin tirtipke keltirip jatqan kezde dári-dárimekti, gýmanitarlyq kómekterdi,jedel járdemdi, aýrýhanalardy jóndep jatqan kezde biz de ózimiz saqtyq sharalaryn saqtap, meditsinalyq normalardy saqtap, indetti jeńýge bir kisidei at salysaiyq», - dedi Ulyqbek Esdáýlet.
Sonymen birge, ol kóp adamdardyń jinalýymen toi, saltanatty sharalar men basqa jiyndardyń áli de ótkiziletinin aityp, el azamattarynan osyndai sharalardy ýaqytsha ótkizbei turýǵa shaqyrdy.
«Baiaǵyda shaqyrǵan jerden qalma deýshi edi, qazirgi kezde shaqyrǵan jerge barma deituǵyn mátel paida boldy. Sonda da qoimastan bizdiń aramyzda, aýyldarymyzda, qalalarymyzda tyǵylyp toi jasaý, tyǵylyp súndet toi, basqa da qyz uzatý, kelin túsirý, týǵan kún degen dúnilerdi, tipti bir túngi klýbtarǵa jinalyp alyp, bolmasa, taýǵa baryp tyǵylyp toi-tomalaq ótkizý ádeti áli de tyiylmai tur. Sonyń bárin pyshaq kesti toqtatý kerek, áitpese biz osyndai tártipsizdik áreketterimizben, normalardy saqtamaý áreketterimizben koronavirýs siiaqty dushpanǵa kómektesken bolyp shyǵamyz. Sondyqtan myń jerden qazaqtyń toiǵa barmasa uiat, toi bolmasa uiat, qonaq shaqyrmasa uiat, qonaqqa barmasa uiat deitin ádetterine qazaqtyń uiaty kináli bolsyn degen oimen jazyp, taratyp jatqandar bar. Menińshe bul durys emes. Qazaqtyń uiatyna tiispeý kerek. Qazaqtyń ar-uiaty árqashanda biikte. Munyń sebebin izdeitin bolsaq, uiattan emes, uiatsyzdyqtan, tártipten emes, tártipsizdikten izdeýimiz kerek. Sondyqtan qashan da saqtyq sharalaryn abailap, meditsinalyq normalardy qoldanyp, barlyǵyna da abai bolaiyq. Úmitpen ómir súreiik, senimmen kún kesheiik! Aman-saý júzdeseiik degim keledi», - dedi Ulyqbek Esdáýlet.
Jazýshy Smaǵul Elýbai ózińe ǵana emes, ainaladaǵy adamdardyń da densaýlyǵyna bei-jai qaramaý kerek ekenin atap ótti.
«Qurmetti almatylyqtar! Qazir Almaty qalasyndaǵy aty jaman indetke bailanysty jaǵdai óte kúrdeli bolyp otyr. Sol kúrdeli jaǵdaidy 17 kún aýrýhanada, mobildi ortalyq degen aýrýhanada jatyp, óz kózimmen kórip, bastan keshken adam retinde pikir aitqymyz kelip otyr. Sol aýrýhana kereýetinde jatyp, biz 17 kún boiy bir nárse ǵana tiledik. Ol osy bizdiń basymyzdan keship jatqan ahýaldy adam basyna bermegei dep tiledik jáne eń aldymen, jaqyndarymyzǵa, balalarymyzǵa, nemerelerimizge osy nárseni kórsetpegei dep tiledik. Almaty qalasynda bul indetti juqtyrý deńgeii qazir óte joǵary, sondyqtan da almatylyqtardyń toi, basqosý, janaza, sodan keiin ásirese, jastardyń basqosýy toqtamai tur shynyn aitqanda. Ony óz kózimizben kórdik, ondai tragediianyń shet jaǵasyn kózben kórip otyrmyz. Minekei osyndai jaǵdaida maska kiip júrý, adam kóp jinalǵan jerge barmaý, bara qalsa ara qashyqtyqty saqtaý, iaǵni, karantin tártibin saqtaý bárimizge mindet degimiz keledi. Ony saqtamaý tek qana qasiretke alyp keletinin kózben kórip otyrmyz. Aman bolyńyzdar, aǵaiyn!», - dedi S. Elýbai.
