Qaita qurylatyn Tótenshe jaǵdailar ministrliginiń quramyna tórt komitet kirýi múmkin. Bul týraly «Ashyq NQA» portalynda jariialanǵan QR Úkimeti qaýlysynyń jobasynda kórsetilgen.
Ministrlik qurylǵan soń, Ishki ister ministrligine qarasty Tótenshe jaǵdailar komiteti taratylady.
«Qazaqstan Respýblikasy Tótenshe jaǵdailar ministrliginiń vedomstvolary týraly» Qazaqstan Respýblikasy Úkimeti qaýlysynyń jobasy portalda jariia talqylaýǵa 17 qyrkúiekke sheiin shyǵaryldy.
«Qazaqstan Respýblikasy Tótenshe jaǵdailar ministrliginiń Órtke qarsy qyzmet komiteti;
Qazaqstan Respýblikasy Tótenshe jaǵdailar ministrliginiń Azamattyq qorǵanys jáne áskeri bólimderi jónindegi komiteti qurylsyn.
Qazaqstan Respýblikasy Ulttyq ekonomika ministrliginiń Memlekettik materialdyq rezervter komitetiniń ataýy Qazaqstan Respýblikasy Tótenshe jaǵdailar ministrliginiń Memlekettik materialdyq rezervter komiteti ataýyna ózgertilsin.
Qazaqstan Respýblikasy Indýstriia jáne infraqurylymdyq damý ministrliginiń Indýstrialdyq damý jáne ónerkásiptik qaýipsizdik komitetin Qazaqstan Respýblikasy Tótenshe jaǵdailar ministrliginiń Ónerkásiptik qaýipsizdik komitetine jáne Qazaqstan Respýblikasy Indýstriia jáne infraqurylymdyq damý ministrliginiń Indýstrialdyq damý komitetine bólý arqyly qaita uiymdastyrsyn.
Qazaqstan Respýblikasy Ishki ister ministrliginiń Tótenshe jaǵdailar komiteti taratylsyn», delingen jobada.
Sonymen qatar, Ishki ister ministrligi men Indýstriia jáne infraqurylymdyq damý ministrligi zańnamada belgilengen tártipte osy qaýlydan týyndaityn ózge de sharalardy qabyldaýy kerek.
