QR Tótenshe jaǵdailar ministri Iýrii Ilin ýly gazdan qaza tabý oqiǵalaryna pikir bildirdi, dep habarlaidy QazAqparat.
«Bizdiń ministrlik atynan jáne óz atymnan Túrkistan oblysynda qaza tapqandardyń jaqyndaryna kóńil aitamyn. Ókinishke qarai mundai jaǵdailar az emes. Keshe ǵana Mańǵystaý oblysynda eki adam gaz ballon jabdyǵyndaǵy ýly gazdan ýlanyp, qaza tapty. Túrkistan oblysynda gaz jabdyǵyn paidalanǵan jas jigit qaitys boldy», - dedi ministr Ortalyq kommýnikatsiialar qyzmetinde ótken brifingte.
Eske sala ketsek, 17 aqpanda Túrkistan oblysyndaǵy jeke turǵyn úide 5 adamnyń denesi tabyldy, onyń tórteýi kámetleketke tolmaǵan.
Tekserý barysynda 3 bólmeli úide kamin túrindegi pesh (Iran peshi) ornatylǵany jáne oǵan gofrlengen burǵysh qosylǵany anyqtaldy. Ol 1,5 metr qashyqtyqta qabyrǵadaǵy tesik arqyly kóshege shyǵarylǵan. Syrtqy jaǵynan gofrlengen rozetka 5-7 sm ǵana quraidy, osylaisha qatty jel peshtegi tartylystyń nasharlaýyna yqpal etip, ýly gaz bólme ishine taralǵan.
Ministrlik derekterine sáikes, 2020 jyly órt shyqpai tabiǵi gazben ýlaný saldarynan 22 adam, gaz ballon qondyrǵylarynyń jarylysynan 11 adam qaitys boldy, gaz ballon qondyrǵylarynyń 32 jarylysy tirkeldi.
Budan basqa, mamandar avtonomdy jylytý júieleri bar 2 mln jýyq turǵyn úidi aralady, 4 mln astam azamatqa nusqaý berilgen. Ákimdiktermen birlesip, avtonomdy jylytý júiesi bar úilerge datchikter ornatý praktikasy jalǵasyp keledi, barlyǵy 118 myńnan astam datchik ornatylǵan.
