QR Premer-Ministri Asqar Maminniń tóraǵalyǵymen QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiianyń alǵashqy otyrysy ótti, dep habarlaidy "Ult aqparat" primeminister.kz saityna silteme jasap.
Qazaqstanda koronavirýs infektsiiasynyń odan ári taralýyna jol bermeý sharalary týraly Densaýlyq saqtaý ministri Eljan Birtanov, ekonomikany turaqtandyrý týraly Ulttyq ekonomika ministri Rýslan Dálenov, iri saýda nysandarynyń jumysyn shekteýge qatysty jaǵdai men áleýmettik mańyzy bar taýarlardyń baǵasy, óńirlerdegi ahýal týraly Saýda jáne integratsiia ministri Baqyt Sultanov, kólik salasy týraly indýstriia jáne infraqurylymdyq damý birinshi vitse-ministri Qaiyrbek Óskenbaev, qoǵamdyq qaýipsizdikti qamtamasyz etý týraly Ishki ister ministri Erlan Turǵymbaev, aqparat jáne bailanys salasyndaǵy jaǵdai týraly Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev, bilim berý salasyndaǵy ahýal týraly Bilim jáne ǵylym ministri Ashat Aimaǵambetov, qarjylyq turaqtylyqty qamtamasyz etý týraly QR Qarjy naryǵyn retteý jáne damytý agenttiginiń tóraǵasy Madina Ábilqasymova jáne Ulttyq bank tóraǵasy Erbolat Dosaev baiandady.
Oblys ákimderi men respýblikalyq mańyzy bar qalalardyń ákimderi koronavirýstyń taralýyna jol bermeý jáne óńirlerde áleýmettik-ekonomikalyq turaqtylyqty qamtamasyz etý boiynsha qabyldanyp jatqan sharalar týraly baiandady.
Úkimet basshysy barlyq uiymdar men nysandarda epidemiiaǵa qarsy sanitarlyq sharalar ótkizý, dárihanalar jelisin dári-dármektermen jáne jeke qorǵanysh quraldarymen qamtamasyz etý boiynsha sharalardy kúsheitýdi tapsyrdy.
Ishki ister ministrligi men arnaiy memlekettik organdarǵa koronavirýstyń taralýymen kúresýge tartylǵan meditsinalyq jáne karantindik nysandardy qorǵaýdy kúsheitý júkteldi.
«Saýda jáne integratsiia ministrligi iri saýda jelilerimen jáne azyq-túlik taýarlarynyń jetkizýshilerimen, sondai-aq ákimdiktermen barlyq qajetti ónimder men alǵashqy qajettilik taýarlaryn úzdiksiz qamtamasyz etý máselesin pysyqtaýy tiis», — dedi A. Mamin.
Premer-Ministr Tsifrlyq damý, innovatsiialar jáne aeroǵarysh ónerkásibi ministrligine joǵary jyldamdyqty internettiń jumys isteýi men qyzmetterdi barynsha elektrondy túrde kórsetýdi qamtamasyz etýdi jáne qashyqtyqtan jumys isteý rejimine kóshýdi yntalandyrýdy tapsyrdy.
«Ákimder Memleket basshysynyń Tótenshe jaǵdaidy engizý týraly Jarlyǵyna sáikes jergilikti jerlerde tyiym salynǵan jáne shekteý qoiylǵan sharalardy iske asyrýdy jeke baqylaýǵa alýy tiis. Barlyq azamattarǵa eldegi turaqty jaǵdaidy saqtaý jáne Qazaqstanda koronavirýstyń taralýyn boldyrmaý úshin barynsha kúsh salý qajet», — dep túiindedi A. Mamin.
