Qazaqstanda aýmaǵy 2 myń sharshy metrden kem emes iri saýda oiyn-saýyq ortalyqtary saǵat 10:00-den 18:00-ge deiin jumys isteýge ruqsat beriledi.
Alaida sanitarlyq, zalalsyzdandyrý sharalaryn kúsheitý kerek. Bul ózgeristiń karantinge jabylǵan Nur-Sultan men Almaty qalalaryna qatysy joq.
Saýda jáne integratsiia ministrligi men densaýlyq saqtaý ministrligi tótenshe jaǵdai kezinde dámhana, dúken men saýda ortalyqtarynyń jumysyna qatysty buiryqqa ózgeris engizdi.
Qujatta aýmaǵy 2 myń sharshy metrden kem emes iri saýda nysandarynyń saǵat 10:00-den 18:00-ge deiin jumys isteitini jazylǵan. Olardyń ishindegi azyq-túlik dúkenderi men dárihanalar jumysyn ádettegi rejim boiynsha jalǵastyrady. Aýlalardaǵy dúkender de jumysyn toqtatpaidy.
Azyq-túlik emes bazarlar saǵat 11:00-den 17:00-ge deiin jumys isteidi. Sanitarlyq sharalar kúsheitiledi.
Qoǵamdyq tamaqtaný nysandary júmys isteidi, biraq birqatar shekteý engizilgen:
- saýda ortalyǵy aýmaǵyndaǵy dámhanalarda tamaqtanýǵa bolmaidy, tek daiyn taǵamdy úige jetkizý qarastyrylǵan;
- saýda ortalyqtarynyń aýmaǵynda emes dámhanalar tek 22:00-ge deiin jumys isteidi. Kelýshiler sany bir ýaqytta 50 adamnan aspaýy tiis.
"Saýda ortalyqtary men bazarlardy ashý sheshimi qabyldandy. Bul saýda jáne qyzmet kórsetý salasyndaǵy kóptegen azamattardy jumyspen qamtý jáne tabysyn joǵaltpaýmen bailanysty. Biraq barsha kásipkerler bas sanitar dárigerdiń talaptaryn saqtaýy kerek ekenin eskertemiz", - dep jazylǵan habarlamada.
Ózgeris karantin jariialanǵan astana men Almaty qalalarynan basqa aýmaqta qoldanylady. Alaida ákim men bas sanitar dárigerdiń sheshimimen qosymsha shekteý engizilýi múmkin.
