Qarjy sektorynda jaǵdaidy jeńildetý úshin qandai sharalar qabyldanyp jatyr. Bul týraly QR Qarjy naryǵyn retteý men damytý agenttigi tóraǵasynyń birinshi orynbasary Oleg Smoliakov brifing barysynda aityp berdi, dep habarlaidy QazAqparat.
Oleg Smoliakovtyń aitýynsha, qarjy naryǵynyń ornyqtylyǵyn qamtamasyz etý Agenttik qyzmetiniń negizgi basymdyqtarynyń biri.
«Bank sektory aǵymdaǵy daǵdarysty jaǵdailarǵa barynsha daiyn boldy, muny 2019 jyly júrgizilgen bank sektory aktivteriniń sapasyn baǵalaý kórsetti. 2008 jyldan beri jinaqtalǵan kóptegen problemalar anyqtalyp, retteldi. Sonymen birge bank sektorynyń barynsha joǵary ótimdilik deńgeii bar. Bankterdegi biznes-protsesterdiń sapasyn jaqsartý jónindegi júieli jumysy jalǵasýda. Qazirgi ýaqytta Agenttik AQR nátijeleri boiynsha túzetý sharalarynyń josparlaryn banktermen kelisý jónindegi jumysty aiaqtaýda. Sonymen birge kapitaldandyrýǵa qoldaý kórsetý jónindegi talaptary jáne qarjylyq ornyqtylyqty arttyrýdyń qoldanystaǵy baǵdarlamasy sheńberinde aǵymdaǵy kredittik táýekelderdi qamtamasyz etý tetikteri ýaqtyly ári oryndy bolǵanyn pandemiiamen bailanysty aǵymdaǵy jaǵdai kórsetip otyr»,– deidi Oleg Smoliakov
Sonymen qatar, ol suranystyń, kiristerdiń tómendeýine, kásiporyndar qyzmetiniń toqtatylýyna bailanysty ekonomikanyń naqty sektorynda jańa táýekelder týyndap, olar qarjy sektoryna da áser etetinin aitty.
«Koronavirýs pandemiiasynyń teris saldarlaryn eńserý, biznesti kreditteýge qoldaý kórsetý jáne qaryz alýshylardyń borysh júktemesimen bailanysty táýekelderdi azaitý úshin daǵdarysqa qarsy qosymsha sharalar qabyldandy. Atap aitsaq, 2020 jylǵy 30 naýryz - 30 qyrkúiek aralyǵyndaǵy kezeńde prýdentsiialyq retteýdiń ýaqytsha kontrtsikldik sharalary engizildi. ShOB jeńildikpen kreditteý baǵdarlamasy ázirlenip, iske asyrylýda, ol úshin 600 mlrd teńge bólindi, sonymen qatar TJ kezinde zardap shekken qaryz alýshylar tólemderiniń merzimin keiinge qaldyrý kózdeldi, – deidi ol.
