Memleket basshysy Qasym-Jomart Toqaev qazaqstandyq tennisshi Elena Rybakinany WTA reitinginde álemniń birinshi raketkasy atanýymen quttyqtady, dep habarlaidy ult.kz.
Prezident quttyqtaýynda sportshynyń bul jetistikke erekshe talanty, tynymsyz eńbegi jáne ózine degen seniminiń arqasynda jetkenin atap ótti.
«Siz airyqsha talant pen tynymsyz eńbektiń jáne ózińizge degen nyq senimniń arqasynda WTA reitinginde kósh bastap, biik shyńdy baǵyndyrdyńyz. Osynaý tarihi jeńisińiz qazaq sportynyń dańqyn asyrdy. Esimińiz álemdik tennis jylnamasynan oiyp turyp oryn aldy», – dedi Qasym-Jomart Toqaev.
Memleket basshysy Rybakinanyń jetistikke toly joly Qazaqstannyń jas sportshylary men álemdegi milliondaǵan tennis jankúieri úshin úlgi ekenin aitty.
Sondai-aq Prezident sportshynyń kortta ǵana emes, qoǵamdyq oryndarda jáne jurtshylyqpen qarym-qatynas kezinde de joǵary mádeniet tanytatynyn erekshe atap ótti.
Qasym-Jomart Toqaev Elena Rybakinaǵa chempiondarǵa tán jalyndy rýhtan qýat alyp, aldaǵy ýaqytta da jańa belesterdi baǵyndyra berýine tilektestik bildirdi.
