Qazaqstan Prezidenti Qasym-Jomart Toqaev AQSh Kongresi Ókilder palatasynyń delegatsiiasymen kezdesti. Delegatsiiany Ókilder palatasynyń Biýdjet jáne salyq jónindegi komitetiniń tóraǵasy Djeison Smit bastap keldi, dep habarlaidy ult.kz.
Kezdesýge Kongress músheleri Greg Merfi, Kerol Miller, Ronni Djekson, Ýesli Bell jáne Edvard Keis qatysty.
Qasym-Jomart Toqaev amerikalyq delegatsiianyń Qazaqstanǵa saparynyń eldegi bir palataly Quryltai sailaýymen tuspa-tus kelýiniń simvoldyq máni bar ekenin atap ótti. Prezidenttiń aitýynsha, parlament sailaýy Qazaqstandaǵy saiasi jańǵyrýdyń jańa kezeńin kórsetetin tarihi oqiǵa boldy. Al bir palataly Quryltai zań shyǵarý úderisiniń tiimdiligi men zańdardyń sapasyn arttyrýǵa múmkindik beredi.
Memleket basshysy parlamenttik diplomatiia jańa organ qyzmetiniń mańyzdy baǵyttarynyń biri bolatynyn aitty.
«AQSh Kongresi men Quryltai músheleri arasyndaǵy konstrýktivti ári mazmundy dialog ózara túsinistikti tereńdetip, ortaq basymdyqtardy ilgeriletý jáne qazaq-amerika seriktestigin nyǵaitý turǵysynan airyqsha mánge ie», – dedi Prezident.
Kezdesý barysynda Qazaqstanda júrgizilip jatqan saiasi jáne áleýmettik-ekonomikalyq reformalar, basqarý júiesin jańǵyrtý jáne ádiletti ári ozyq memleket qurý baǵyttary da sóz boldy.
Sonymen qatar taraptar saýda-ekonomikalyq jáne investitsiialyq bailanystardy, ozyq tehnologiialar, ǵylym, bilim jáne mádeniet salalaryndaǵy yntymaqtastyqty talqylady.
Toqaev Qazaqstan men AQSh arasyndaǵy qarym-qatynastar Prezident Donald Tramppen qalyptasqan senimdi ári konstrýktivti dialogtyń arqasynda buryn-sońdy bolmaǵan deńgeige kóterilgenin atap ótti. Sondai-aq eki eldiń iadrolyq qaýipsizdik pen jappai qyryp-joiý qarýyn taratpaý baǵytyndaǵy yntymaqtastyǵyna toqtaldy.
Óz kezeginde Djeison Smit Qasym-Jomart Toqaevqa delegatsiiany arnaiy qabyldaǵany úshin alǵys aityp, AQSh Prezidenti Donald Tramptyń sálemin jetkizdi.
Kongressmenniń aitýynsha, Tramp Qazaqstan Prezidentimen qalyptasqan senimdi qarym-qatynasty joǵary baǵalaidy. Sondai-aq ol Toqaevty G20 sammitine qatysý úshin Maiamide kútetinin jetkizdi.
Kezdesý sońynda Qasym-Jomart Toqaevtyń Maiamige josparlanǵan sapary Qazaqstan men AQSh arasyndaǵy keńeitilgen strategiialyq seriktestikke jańa serpin beretinine senim bildirdi.
