Qytaidaǵy kóshkinnen qaza tapqandar sany 21 adamǵa jetti, dep habarlaidy ult.kz.
Qytaidyń Gansý provintsiiasynda bolǵan iri kóshkin saldarynan 21 adam qaza tapty.
Qaiǵyly oqiǵa seisenbi kúni Gansý provintsiiasyna qarasty Lýnnan qalasynda bolǵan. Tolassyz jaýǵan jańbyrdan keiin taý betkeiinen opyrylǵan topyraq kóshkini turǵyndar bolǵan aýmaqty basyp qalǵan.
Aldyn ala málimet boiynsha, kóshkin astynda 33 adam qalyp qoiǵan. Oqiǵa ornyna tótenshe jaǵdailar qyzmetiniń mamandary, meditsina qyzmetkerleri men arnaiy tehnika jumyldyrylyp, táýlik boiy izdestirý-qutqarý jumystary júrgizildi.
Qutqarýshylar joǵalǵandardyń barlyǵyn tapqan. Sońǵy málimetke sáikes, 21 adam qaza tapqan. Jeti adam túrli dárejedegi jaraqatpen aýrýhanaǵa jetkizilse, taǵy bes adam din aman qutqarylǵan.
Jergilikti bilik zardap shekkenderge qajetti meditsinalyq jáne psihologiialyq kómek kórsetilip jatqanyn málimdedi. Qazirgi ýaqytta tabiǵi apattyń naqty sebepteri anyqtalyp jatyr.
Sońǵy jyldary Qytaidyń taýly óńirlerinde nóser jaýyn-shashynnan keiin kóshkin men seldiń jiileýi baiqalady. Osyǵan bailanysty bilik turǵyndardy qaýipti aimaqtarǵa barmaýǵa shaqyryp, aýa raiynyń qolaisyzdyǵyna bailanysty qaýipsizdik sharalaryn kúsheitken.
