"AQSh pen onyń odaqtastarynyń áskerin Aýǵanstannan alyp ketýge asa qajettilik bolmaǵan edi, bul sátsiz saiasi qadam boldy", dedi Ulybritaniia eks-premeri Toni Bler 21 tamyz kúni jaryq kórgen jazbasynda. Bul týraly Azattyq radiosy habarlady.
"Bizde oǵan degen muqtajdyq joq edi. Biz bul sheshimdi "máńgilik soǵysty" aiaqtaý degen qisynsyz saiasi uranǵa boi aldyryp qabyldadyq" dep jazdy ol óziniń saitynda.
Britaniialyq Bi-bi-si telearnasy "máńgilis soǵys" tirkesin qoldaný arqyly Bler AQSh prezidenti Djo Baidendi synaǵan bolýy kerek dep topshylady. Óitkeni Baiden sailaýaldy naýqany kezinde osy sózdi jii aitqan.
Blerdiń aitýynsha, AQSh pen onyń odaqtastary keiingi ýaqytta Aýǵanstanda meilinshe az ásker ustaǵan.
"Keiingi 18 aida áskeri operatsiia kezinde odaqtas elderdiń birde-bir sarbazy qaza tapqan joq" dedi ol Aýǵanstandaǵy áskerdi ne úshin qaldyrý kerek bolǵanyn túsindirip.
Eks-premer Ulybritaniia kómektesýge ýáde bergen adamdardyń bári qutqarylmaiynsha, britan kúshteriniń evakýatsiia operatsiiasyn jalǵastyra berýge shaqyrdy.
Blerdiń pikirinshe, Aýǵanstandaǵy qazirgi jaǵdai Batys úshin sátsizdik te, Máskeý, Pekin jáne Tegeran úshin utymdy jaǵdai.
"Resei, Qytai jáne Iran bul jaǵdaidy óz paidasyna jaratady. Al Batys liderlerinen qandai da bir ýáde alǵandar Batystyń shyn máninde eshqandai kepil bermeitinin túsinip otyr" deidi ol.
2001 jyly Batys kúshteri Aýǵanstanǵa basyp kirgende Bler Ulybritaniia premer-ministri bolǵan.
