«Qazaqfilm» kinostýdiiasy túsirgen «Tomiris» kinotýyndysy Parijde ótken 26-shy L’Etrange Festival kinofestivaliniń tolyq metrajdy filmder sektsiiasynda Nouveau Genre gran-priin jeńip aldy. Qazaqstan kinematografiiasy úshin mundai qýanyshty jańalyqty filmniń rejisseri Aqan Sataev bólisti, dep habarlaidy "Ult aqparat".
«Dostar, qýanyshty jańalyqty bólisýge asyqpyz! «Tomiris» kinotýyndysy Parijde ótken 26-shy L’Etrange Festival kinofestivaliniń tolyq metrajdy filmder sektsiiasynda Nouveau Genre gran-priin jeńip aldy. Festival seriktesteriniń biri, álemdegi eń iri frantsýz tilindegi aqyly telearna CANAL+ bizdiń filmdi praim-taimda kórsetedi» dep jazdy Aqan Sataev Instragram paraqshasynda.
Eske sala keteiik, byltyr jaryqqa shyqqan kinotýyndy bizdiń zamanymyzǵa deiingi VI ǵasyrda bolǵan oqiǵany sýretteidi.
Filmde kishkentai qyzdan aibyndy jaýyngerge ainalǵan, jaqyndarynan airylyp, satqyndardan óshin alǵan jáne saq taipalaryn biriktirgen uly dalanyń aty ańyzǵa ainalǵan Tomiris patshaiymynyń taǵdyry baiandalady.
Film QR Mádeniet jáne sport ministrliginiń tapsyrysymen «Qazaqfilm» kinostýdiiasynda Sataifilm kompaniiasynyń qatysýymen túsirilgen. Áliia Nazarbaeva bas prodiýser bolǵan filmge Aqan Sataev rejisserlik etken.
Filmniń basty rólderinde Almira Tursyn, Ádil Ahmetov, Azamat Satybaldy, Erkebulan Daiyrov, Berik Aitjanov, Aian Ótepbergen, Asylhan Tólepov syndy akterler oinady.
