«Tomiris» filmine qansha qarajat jumsalǵany jariialandy, dep habarlaidy QazAqparat.
«Filmniń túsirilimine 10 mln dollardan az aqsha ketti. «Qazaq handyǵy» serialy men basqa da filmderdiń biýdjeti de sondai. «Qazaqfilmniń» biýdjetinde eń qymbat film – Kóshpendiler. Ol týyndyǵa shetelden ártisterdiń tartylǵanyn bilesizder. Shetel mamanyn shaqyrý – kino biýdjetine qatty áser etedi. «Qazaq handyǵy: Almas qylysh» jáne «Qazaq handyǵy: Altyn taq» filmin shyǵarǵan kezde bizge «Shyńǵyshannyń» 38 serialyn túsirgen Batyr atty rejisserdi shaqyrdyq. Biz ony áý basta shaqyryp, ol konsýltant retinde jumys istep, aqyry bul filmniń túsirilýine ol 50-100 mln dollar kerektigin aitty. Aqyry, onyń qalaýy bizdiń oń jambasqa kelmedi de, onymen qoshtasyp, 10 mln dollarǵa «Qazaq handyǵyn» túsirdik. Al «Tomiris» filmine shamamen 3 mlrd teńge jumsaldy», - dedi «Qazaqfilm» AQ prezidenti Arman Ásenov OKQ-da ótken baspasóz máslihatynda.
Baspasóz máslihaty barysynda Mádeniet jáne sport vitse-ministri Nurǵisa Dáýeshev film biýdjetin naqtylady.
«Tomiris» filmine 2 mlrd 259 mln teńge jumsaldy», - dedi ol.
Eske sala ketsek, rejisser Aqan Sataev osy jazda «Tomiris» filminiń treilerin jariialaǵan bolatyn. Treilerde jaqyndarynan aiyrylǵan kishkentai Tomiristiń Saq patshaiymy laýazymyna deiingi ómir joly kórsetiledi. Onda Saq taipalarynyń Parsy patshasy Kirge qarsy joryǵy kórinis tapqan jáne keiipkerler ejelgi túrki, ejelgi parsy tilderinde sóileidi.
Filmge elimizdiń tanymal kinojuldyzdary Dimash Ahimov, Erik Joljaqsynov, Baikenje Belbaev, Berik Aitjanov, Erkebulan Daiyrov, Murat Bisembin, Azamat Satybaldy, Ádil Ahmetov, Aijan Laidji, Aian Ótepbergen, Asylhan Tólepov, Ashat Úrpekovter túsken.
Film 27 qyrkúiekten bastap prokatqa shyǵady.
