Qazaqstandyq kaskaderler toby Álemdik kaskaderler akademiiasynyń (AQSh) «Taurus» syilyǵyna ie boldy, dep habarlaidy "Ult aqparat".
«Nomad Stunts» kaskaderler toby bul syilyqty «Qazaqfilm» kinostýdiiasy túsirgen «Tomiris» filmindegi triýkter úshin jeńip aldy. Bul týraly buǵan deiin jazǵan edik.
«Qurmetti dostar, búgin 12 kelilik «Taurus» syilyǵy AQSh-tan @nomadstunts kaskaderler tobyna jáne onyń jetekshisi @kunguzhinov-ke jetkizildi. Bul álemdegi kaskaderlerdiń eń bedeldi kásibi syilyǵy, ony bizdiń «Qazaqfilm» kinostýdiiasynyń týyndysy - «Tomiris» filmindegi triýkterdi joǵary deńgeide qoiyp, oryndaǵany úshin jeńip aldy», - dep jazdy Sh.Aimanov atyndaǵy «Qazaqfilm» kinostýdiiasynyń basshysy, filmniń rejisseri Aqan Sataev Instagram-da.
«Nomad Stunts» kaskaderler tobynyń jetekshisi Jaidarbek Kúnǵojinovtiń aitýynsha, beldi syilyqty Qazaqstan Ortalyq Aziia elderi arasynda alǵashqy bolyp ielenip otyr. «Taurus» qazaqstandyq komandaǵa «Shetel filmindegi eń úzdik triýkter» nominatsiiasy úshin berilgen.
Onyń atap ótýinshe, bul marapat kaskaderler úshin «Oskar» syilyǵymen para-par.
J.Kúnǵojinov Facebook-paraqshasynda bólisken fotosýrette «Taurus» músinshesine buǵan deiin amerikalyq akterler Silvester Stallone, Arnold Shvartsenegger ie bolǵanyn kórýge bolady. «Óz komandama alǵys bildiremin. Solardyń arqasynda buǵan Qazaqstan jáne Ortalyq Aziia tarihynda alǵash qol jetkizdik. Bul úshin jaraqattar arqyly 20 jyl júrip óttik jáne Gollivýdta eń úzdik bola alatynymyzdy dáleldedik!», - dedi ol.
Aita keteiik, Nomad Stunts - bul qazaqstandyq kaskader Jaidarbek Kúnǵojinov 2000 jyly qurǵan halyqaralyq kásibi kaskaderler toby. Onyń quramynda búginde 86 adam bar.
«Tomiris» kinotýyndysy bizdiń zamanymyzǵa deiingi VI ǵasyrda bolǵan oqiǵany sýretteidi. Filmde kishkentai qyzdan aibyndy jaýyngerge ainalǵan, jaqyndarynan airylyp, satqyndardan óshin alǵan jáne saq taipalaryn biriktirgen uly dalanyń aty ańyzǵa ainalǵan Tomiris patshaiymynyń taǵdyry baiandalady.
Film QR Mádeniet jáne sport ministrliginiń tapsyrysymen «Qazaqfilm» kinostýdiiasynda Sataifilm kompaniiasynyń qatysýymen túsirilgen.
Kartina Parijde ótken L’Etrange Festival 26-shy kinofestivaliniń tolyq metrajdy filmder sektsiiasynda Nouveau Genre gran-priin jeńip aldy.
