Uzaq jyldar qazaqstandyq Gennadii Golovkinniń (38-1-1, 34 KO) isin júrgizip kele jatqan promoýter Tom Leffler BoxingScene basylymyna bergen suhbatynda qazaqstandyqtyń bokstan ketýine ne sebep bolatynyn aitty, dep habarlaidy "Ult aqparat" Vesti.kz portalyna silteme jasap.
35 jastaǵy qazaqstandyq sońǵy ret 15 qyrkúiek Las-Vegasta meksikalyq Saýl "Kanelo" Alvarespen (50-1-2, 34 KO) judyryqtasyp, tóreshiler sheshimi boiynsha jeńilgen.
Osylaisha, Golovkin WBC, WBA (Super) jáne IBO belbeýlerinen aiyryldy. Qarymtadan keiin eki boksshy da úshinshi ret judyryqtasýǵa daiyn ekenderin málimdegen edi. Al GGG komandasy meksikalyqpen qarymta biylǵa sońǵy jekpe-jek ekenin aityp otyr. Qazaqstandyq ringke tek kelesi jyly kóktemde oralady.
"Basynan-aq eshqandai ýaqyt shekteýi bolǵan joq. Gennadii sporttan ainalysýǵa zaýqy soqpai, qyzyǵy joǵalǵanda ǵana ketetin boksshy. Talqylaityn áńgime onyń jasy emes, Alvarespen jekpe-jektegi tóreshilerdiń ádiletsizdigi. Óitkeni ol eki ret te jeńgen. Tóreshilerdiń jazǵany ringte bolyp jatqandy únemi anyq jetkize bermeidi jáne jalpy qabyldaýǵa sáikespei qalady. Biraq bul bólek áńgime. Ázirge Gennadii kóńil kóterip, jaqsy jekpe-jekterge shaqyrýlar baryn baiqap júr, al onyń tanymaldyǵy burynǵydan joǵary. Jankúierler ony qarymtada jeńdi dep biledi jáne ol chempion bolyp qalý kerek dep esepteidi. Biz Beverli Hillstaǵy demeýshilerdiń birine kelgen edik, sýret pen qoltańba suraǵan tabynýshylary qorshap alǵandyqtan, kósheniń arǵy betine óte almadyq. Jalpy Alvarespen qarymtadan keiin ol áigili bola tústi", - deidi Leffler.
Sonymen birge, Golovkin "Kanelomen" judyryqtasýdy surap, WBC arqyly buǵan qalaida qol jetkizbek ekeni habarlandy.
