Uly ádebiet álemge ortaq. Biz sol uly ádebietti jasaýǵa tyrysýymyz kerek. Memlekettik syilyq iegeri, jazýshy, qoǵam qairatkeri Tólen Ábdik osyndai pikir bildirdi, dep habarlaidy QazAqparat.
«Jalpy, ádebiet bir ulttyń aiasyna syimaidy. Ol – búkil adamzattyń ortaq igiligi. Mysaly, Tolstoi, Dostoevskiiler tek bir orys ádebietiniń ókili dep aita almaisyń. Olardyń shyǵarmalarymen álem sýsyndaidy. Sol siiaqty Shekspir de bir ǵana aǵylshyn ádebietiniń aýqymyna syimaidy. Sondyqtan, uly ádebiet - ortaq. Biz sol uly ádebietti jasaýǵa tyrysýymyz kerek», - dedi Tólen Ábdik Aziia qalamgerleriniń I forýmy kezinde tilshilerdiń suraǵyna jaýap bere otyryp.
Tólen Ábdiktiń aitýynsha, elordada ótip jatqan Aziia qalamgerleriniń I forýmy - álem ádebietshileriniń, jazýshylarynyń basyn qosý degen sóz.
«Jazýshynyń maqsaty – qoǵamnyń boiyna adamgershilik, izgilik qasietterin sińirý. Al eger adamnyń boiynda izgilikke degen senim, qylmysqa degen jekkórinish sezim bolsa, birin-birin qurmettei alsa, jer betinde soǵys ta, terrorizm de bolmaidy. Sol sebepti biz kórkem ádebietti nasihattaýymyz kerek. Álem ádebietinde pikirlesý, óz problemalaryn ortaǵa salý degen bolý tiis. Sondyqtan bizdiń Jazýshylar odaǵy uiymdastyryp jatqan búgingi forým - óte qajetti shara. Biz - búkil álemdik ádebiettiń bir bólshegimiz. Tek qazaq halqyna ǵana qajettimiz degen bolmaidy. Óitkeni izgilik, adamgershilik, mahabbat degen uǵymdar barlyq halyqta birdei. Adamzattyq qundylyqtar bárimizdi biriktirý kerek», - dedi Tólen Ábdik.
Jazýshynyń aitýynsha, qazirgi qazaq ádebietinde álem oqyrmanyna tanystyratyn shyǵarmalar jeterlik, barshylyq.
