Tólebi aýdanyndaǵy selden zardap shekken aýmaqtarda bolǵan Túrkistan oblysynyń ákimi Ómirzaq Shókeev jergilikti deńgeidegi tótenshe jaǵdai jariialanyp, arnaiy shtab qurylǵanyn aittty, dep habarlaidy "Ult aqparat".
Sońǵy aqparattarǵa sáikes, taýly aýdandaǵy aryq-atyzdar men qyr-sailardan jinalyp aqqan jańbyr sýy eldi mekenderge jaiylǵan. Saldarynan 6 eldi mekendegi 260 turǵyn úidiń aýlasyna sý kirip, ondaǵy turǵyndar mektepterde ashylǵan evakýatsiialyq ortalyqtarǵa kóshirilgen. Ázirge mamandar 27 úidiń qulaý qaýpi bar ekenin aitady. Tosynnan kelgen tabiǵi apat saldaryn kórgen óńir basshysy jurtty sabyrǵa shaqyryp, jaǵdai retteletinin jetkizdi.
«Tólebi aýdanynda ainalasy 40 minýttyń ishinde 1 ailyq jańbyr jaýǵan. Bul sońǵy jyldary alǵash ret oryn alǵan tabiǵi qubylys. Qaýipsiz aýmaqqa kóshirilgenderińiz durys boldy. Úilerdi politsiia qyzmetkerleri kúzetedi. Ol jaǵyn ýaiymdamańyzdar. Saman úi qulasa, ózderińiz úshin qaýipti. Barlyq aýdandar osynda kómekke kelip jatyr»,- dedi Ómirzaq Shókeev.
Bir túnde tabiǵi apattan zardap shekken tólebilikterge kórshiles Qazyǵurt, Sairam jáne Ordabasy aýdandarynan kómek kelip jetti. Tótenshe jaǵdai qyzmetkerleri halyqty evakýatsiialap, olardy qajetti zattarmen jáne ystyq tamaqpen qamtamasyz etýde.
