Ulttyq Olimpiada komitetiniń bas hatshysy Andrei Kriýkov XXXII jazǵy Olimpiada oiyndaryna baratyn qazaqstandyq sportshylardyń epidemiologiialyq qaýipsizdigi qalai qamtamasyz etiletinin aitty, dep habarlaidy QazAqparat.
Komitettiń bas hatshysynan BAQ ókilderi Tokiodan naqty qansha medal kútýge bolatynyn suraǵan bolatyn.
«Búkil álem qazir pandemiia jaǵdaiynda tur. Biz qazir sportshylardyń bárin oqshaýlap jatyrmyz. Bári 14 kúndik karantinge alynady. Óitkeni Olimpiadanyń ashylý saltanatyna 20 kún ǵana qaldy. Bizdiń qazirgi mindetimiz sportshylarymyz utyp alǵan litsenziialardyń sany boiynsha túgel Tokioǵa jetkizý. Toǵioǵa barǵan soń da olardyń qaýipsizdigin qamtamasyz etemiz. Osydan keiin ǵana boljam aitýǵa bolady. Sporttyń aty – sport. Qazir eshbir sport túrinen 100 paiyz senimdi boljamdy kesip aita almaisyń. Taǵy bir mańyzdy dúnie, komanda Tokioǵa jetken kezde ǵana sportshylardyń kúii qandai ekenin kóre alamyz», - dedi Andrei Kriýkov.
Ulttyq Olimpiada komitetiniń bas hatshysy Tokiodan jýrnalisterge kontent usyný máselesi áli tolyq aiqyndalmaǵanyn da atap ótti. Óitkeni Halyqaralyq Olimpiada komiteti men Japoniia tarapy sheteldik jýrnalisterdiń kelýin qatty shektep otyr.
«Jýrnalistermen de sol kezde tyǵyz jumys isteimiz. Biz arnaiy baǵdarlama daiyndap qoidyq. Halyqaralyq Olimpiada komiteti de, Tokio biligi de jýrnalisterdiń sportshylarmen aralasýyn qatty shektegenin bilesizder. Buryn baspasóz ortalyǵyn uiymdastyryp, sportshylarmen kózbe-kóz bailanysa alsaq, qazir bul múmkin emes. Jýrnalistermen jumys qalai júretinin qazir ashyp aita almaimyz. Kontentti qalai alatynymyzdy da aita almaimyz», - deidi komitet ókili.
Osynyń bárin eskergen Ulttyq Olimpiada komiteti Tokiodan taratylatyn kontentti barlyq BAQ ókilderin olympic.kz portaly arqyly usynýdy josparlap otyr.
«Olympic.kz portaly arqyly búkil kontent jýrnalister úshin qoljetimdi bolady. Mundai birinshi ret bolǵaly otyr. Óitkeni sportshylarǵa qol jetkizý múmkin bolmaiyn dep tur. Qurǵaq jańalyq kóshirip taratý men sporshyny tikelei áńgimege tartý arqyly kontent taratý eki bólek dúnie ekenin túsinemiz», - dedi Andrei Kriýkov.
