Qazaqstan atynan Toqkiodaǵy Olimpiada oiyndaryna qatysatyn sportshylar jyl basynan beri keminde 14 retten doping-test tapsyrǵan, dep habarlaidy QazAqparat.
Bul týraly Ulttyq Olimpiada komitetiniń bas hatshysy Andrei Kriýkov aitty.
«Doping máselesi óte ózekti. Álem boiynsha búginde keń aýqymda kúres júrip jatyr. Tipti pandemiia kezinde de sportshylardy testileý protsesi toqtaǵan joq. Bizdiń ulttyq dopingke qarsy ortalyǵymyzdyń mamandary da, halyqaralyq federatsiialardyń doping ofitserleri de arnaiy shyǵyp, testileý ótkizip otyrdy. Biz de dopingke tózim bolmaitynyn málimdep júrmiz. Doping týraly jańa zań doping rejimin buzýshylardy eleýli sharalarǵa tap keltiredi. Dopingpen bailanysty kez kelgen zań buzý áreketi qatań jazalanatynyn aitý kerek», -dedi komitettiń bas hatshysy.
Onyń aitýynsha, qazaqstandyq sportshylar jyl basynan beri halyqaralyq doping-ofitserlerdiń jiti nazarynda bolǵan.
«Atletterdiń árqaisysynda jeke testileý jospary bar. Testileý ashyq bolýy úshin, túrli aila-sharǵylardy boldyrmaý úshin tekserýdi eki uiym ǵana jasaidy. ITA halyqaralyq uiymy men ózimizdiń Ulttyq dopingke qarsy ortalyq júrgizedi. Halyqaralyq uiym jeti aidyń ishinde sportshylardy 10-12 retten tekserdi. Iaǵni, bul mindetti protsedýra. Odan jaltarýǵa bolmaidy. Sportshylar ózderiniń ornalasqan jerin aityp otyrýy kerek, testileý aiaq astynan, eshbir eskertýsiz júrgiziledi. Sondyqtan qandai da bir áreket jasaý qiyn. Ózimizdiń dopingke qarsy ortalyqtyń mamandary ár sportshyny 2-4 retke deiin testileýden ótkizdi. Biz óz tarapymyzdan barlyq aldyn alý jáne baqylaý sharalaryn atqaryp otyrmyz», - dedi Andrei Kriýkov.
