Halyqaralyq Berlin kinofestivaliniń «Forým» baǵdarlamasynda Sháken Aimanov atyndaǵy «Qazaqfilm» túsirgen «Aqyn» filminiń eýropalyq tusaýkeseri ótti, dep habarlaidy QazAqparat.
Otandyq týyndyny prodiýser Iýliia Kim jáne aktrisa Gúljan Túzelbaeva tanystyrdy.
«Filmniń tusaýkeserine qatysyp otyrǵanymyzǵa óte qýanyshtymyz. Rejisser Dárejan Ómirbaev kórsetilimge qatysa almady. Bizdiń film Tiktok jailaǵan dáýirde saf ónerdiń – poeziianyń eshkimge de kerek bolmai qalǵany týraly baiandalady. Meniń oiymsha, shynaiy ónerge berilgen keibir shyǵarmashylyq jandar bul filmde ózderin kóre alady. Men filmdegi basty keiipkerdiń obrazynda rejisserdiń ózin kórip turǵandaimyn. Osy kinotýyndynyń jaryq kórýine atsalysýǵa múmkindik bergen Dárejan Ómirbaevqa alǵysymdy bildiremin», - dedi Iýliia Kim.
Qazaqstandyq kinotýyndy Berlin kinofestivali kórermenderiniń erekshe qyzyǵýshylyǵyn týdyrǵan. Bul kórsetilimge biletter birneshe kún buryn satylyp ketken eken. Tusaýkeserge kelgen qonaqtardyń arasynda Dárejan Ómirbaevtyń shyǵarmashylyǵymen burynnan tanys kórermender de boldy.
«Aqyn» filmi tehnologiialar damyǵan qazirgi zamanda ónerdiń qoǵamda alatyn orny týraly oi qozǵap, poeziiaǵa suranys azaiǵan dáýirde aqynnyń kúiinishi týraly syr shertedi. Qazaq halqynyń XIX ǵasyrdaǵy eń kórnekti aqyndarynyń biri Mahambet Ótemisulynyń qily taǵdyry jaiynda oiǵa batqan basty keiipker názik júrekti aqyndardyń ómiri qashan da qiyn bolǵanyn túsinedi. Filmniń stsenariii nemis jazýshysy German Gesseniń «Avtorlyq kesh» atty avtobiografiialyq áńgimesi jelisimen jazylǵan. Filmdegi basty róldi «Jigitter» tobynyń ánshisi Erdos Qanaev somdaidy.
Eske sala ketsek, atalǵan film Tokioda ótken halyqaralyq kinofestivalde alǵash kórsetilip, Dárejan Ómirbaev «Úzdik rejisser» júldesimen marapattalǵan bolatyn.
Osymen 72-shi ret ótkizilip jatqan Halyqaralyq Berlin kinofestivaliniń jeńimpazdary aqpannyń 16-nda jariialanady.
