Qazaqstandyq boksshy Vasilii Levit Tokio Olimpiadasynyń shirek finalyna shyǵa almady, - dep habarlaidy "Ult aqparat".
91 kelige deiingi salmaq dárejesinde óner kórsetken ol 1/8 finalda ispaniialyq Emmanýel Reiespen judyryqtasty.
Jekpe-jek óte tartysty bastalǵan. Birinshi raýnd ispaniialyq boksshy Emmanýel Reiestiń paidasyna sheshildi. Al ekinshi raýndtyń basynda Levit qarsylastyń seriialyq soqqysynan keiin nokaýtqa túsip qaldy. Biraq aiaǵyna turdy. Tóreshi onyń teńselip turǵanyn kórip, jekpe-jekti toqtatty.
33 jastaǵy Levit - Qostanai oblysynyń týmasy. 2016 jyly Rio Olimpiadasynyń finalynda jeńilip, bul jekpe-jek jankúierler men sarapshylar arasynda daý shyǵarǵan bolatyn. Odan bólek, Levit 2017 jáne 2019 jyldary álem chempionatynda qola medal alǵan, 2009, 2015 jáne 2017 jyldary Aziia chempiony atanǵan. Biyl qurlyqtyq jarysta kúmis medal enshilegen bolatyn.
Olimpiadanyń 1/8 finalynda Qazaqstannyń ekinshi boksshysy jarys jolynan shyǵyp otyr. Buǵan deiin 69 kelige deiingi salmaqta Abylaihan Júsipov shirek finalǵa shyǵa almaǵan edi.
Al, Serik Temirjanov (57 keli), Zakir Safiýllin (63 keli) men Sáken Bibosynov (52 keli) alǵashqy jekpe-jekterin sátti ótkizdi.
Odan bólek, ringke shyqpaǵan Ábilhan Amanqul (75 keli), Bekzat Nurdáýletov (81 keli) pen Qamshybek Qońqabaev (91 keliden joǵary) syndy boksshylarymyz bar. Al áielder arasyndaǵy boksta el namysyn jalǵyz Nadejda Riabets (75 keli) qana qorǵaidy.
Eske salaiyq, qazir Qazaqstan qorjynynda úsh medal bar. Dziýdoshy Eldos Smetov, aýyratletter Igor Son men Zúlfiia Chinshanlo qola medal ielengen bolatyn.
