Tokio gýbernatory Iýriko Koike jazǵy Olimpiada oiyndarynyń obektilerin aralaýǵa tyiym salynady dep málimdedi. Onyń sózinshe, bul shara koronavirýs indetiniń aldyn alý qajettiginen týǵan. El premer-ministri Esihide Sýgamen kezdeskennen soń Koike ekskýrsiiaǵa arnalǵan oryndardyń vaktsinalaý pýnkterine ainalatynyn aitty. Bul týraly The Japan Times basylymy habarlady.
Biylǵy Olimpiada oiyndaryn óz aýmaǵynda ótkizetin Japoniiada úkimet koronavirýs indetiniń taraýyn qolǵa ala almaǵany úshin qoǵam synyna ushyrap keledi.
The Japan Times basylymynyń jazýynsha, uiymdastyrýshylar, úkimet músheleri jáne densaýlyq mamandary kórermenderdi jarys tamashalaýǵa kirgizý-kirgizbeý máselesinde áli daýlasyp otyr.
Premer-ministr Esihide Sýga kórermenderdi kirgizýdi maquldap, Tokio qalasy úshin tótenshe jaǵdaidy 20 maýsym kúni aiaqtaý týraly sheshim qabyldady.
Biraq eldiń úkimettiń Covid jónindegi komitetin basqaratyn Shigerý Omi kórermenderdi jarys oryndaryna kirgizbeý kerek dep otyr.
Omi bastaǵan sarapshylar tobynyń 18 maýsym kúni jariialaǵan baiandamasynda kórermendi qatystyrmaý Olimpiada oiyndaryn ótkizýdiń eń qaýipsiz joly bolmaq dep jazylǵan.
Dúisenbi, 21 maýsym kúni gýbernator Koike men premer-ministr Sýga Halyqaralyq Olimpiada komitetimen jáne Halyqaralyq paralimpiada komitetimen kezdesip, jarystarǵa qansha jankúier qatysa alatynyn talqylaýy tiis.
