Dál qazir Japoniia astanasy Tokio qalasynda XXXII jazǵy Olimpiadanyń ashylý saltanaty bastaldy, dep habarlaidy "Ult aqparat".
Biyl dúbirli dodada 33 sport túrinen 339 medal jiyntyǵy sarapqa salynady. Olimpiada baǵdarlamasyna beisbol/softbol, karate, serfing, sporttyq quzǵa órmeleý jáne skeitbording sekildi sporttyń bes túri engizilgen.
Aldyn ala málimet boiynsha aitýly alaman básekege jer betindegi 206 memleketten 11 myńnan astam sportshy qatysady dep kútilýde. Jarysqa qatysýshylardyń teń jartysyna jýyǵy áielder bolmaq. Uiymdastyrýshylar onyń genderlik teńdikti bildiretinin aitady.
Atalǵan sharany uiymdastyrýǵa jaýapty mamandardyń aitýynsha, Tokio tórindegi aitýly shara eldiń esinde innovatsialyq Olimpiada retinde erekshelenetin bolady.
Qazaqstandyq 97 sportshy kúnshyǵys elinde sporttyń 28 túrinen baq synaidy. Qazaqstan Ulttyq olimpiadalyq komiteti aitýly alamanǵa baratyn tizimdi naqtylaý maqsatynda irikteý jáne reitingtik jarystary aiaqtalǵannan keiin qorytyndy shyǵardy.
Tokio tórinde Qazaqstan jalaýyn qyzylordalyq boksshy Qamshybek Qońqabaev pen jeńil atlet Olga Rypakova ustap shyǵady.
Biyl Olimpiada óziniń tarihynda 32-márte jalaýyn jelbiretedi. Tuńǵysh ret 1896 jyly Grekiia jerinde bastalǵan aitýly sport dodasy sodan beri barsha adamzat balasynyń qyzyǵa tamashalaityn básekesine ainaldy.
Álem jurtshylyǵy AQSh-ty atalǵan saiysty eń kóp uiymdastyrylǵan el retinde tanidy. Onda 4 ret jazǵy jáne 4 ret qysqy Olimpiada ótkizilgen. Al Frantsiia 2 jazǵy, 3 qysqy alamannyń alaýyn jaqty. Odan keiingi kezekte Ulybritaniia 3 ret (3/0), Germaniia 3 ret (2/1), Japoniia, Italiia, Kanada 3 ret (1/2) osyndai senimge ie bolǵan.
Aita ketken jón, jarystyń ashylý saltanatyna Halyqaralyq Olimpiada komitetiniń (HOK) Prezidenti Tomas Bah pen Japoniia imperatory qatysýda.
