Elimizde Tokio-2020 Olimpiada oiyndaryn aqparattyq qoldaý týraly memorandýmǵa qol qoiyldy, dep habarlaidy QazAqparat.
QR Aqparat jáne qoǵamdyq damý ministrligi, Ulttyq Olimpiada komiteti qoǵamdyq birlestigi jáne «Qazaqstan Respýblikasynyń Ulttyq Paralimpiada Komiteti» qoǵamdyq birlestigi arasynda Tokio-2020 Olimpiada oiyndary men Tokio-2020 Paralimpiada oiyndary qarsańynda jáne onyń barysynda yntymaqtastyq týraly memorandýmǵa qol qoiyldy.
Memorandýmǵa Aqparat jáne qoǵamdyq damý vitse-ministri Nurgúl Maýberlinova jáne QR Ulttyq Olimpiadalyq komitetiniń Bas hatshysy Sáken Musaibekov, Ulttyq Paralimpiadalyq komitetiniń atqarýshy direktory Erlan Súleimenov qol qoidy.
Memorandým aiasyndaǵy yntymaqtastyqtyń maqsaty – Tokio-2020 Olimpiadasy men Tokio-2020 Paralimpiada oiyndarynyń qarsańynda jáne barysynda Olimpiadalyq jáne Paralimpiadalyq qozǵalys qaǵidattaryn keńinen nasihattaý, Qazaqstan Respýblikasyndaǵy joǵary jetistikter men buqaralyq sport túrlerin damytý.
Nurgúl Maýberlinova óziniń quttyqtaý sózinde memorandýmnyń jáne aldaǵy Olimpiada oiyndarynyń mańyzdylyǵyn atap ótti.
«Olimpiada oiyndary - bul úlken jahandyq mereke. Ol, árine, sportty jáne salaýatty ómir saltyn nasihattaýǵa úlken úles qosyp qana qoimaidy, sonymen qatar, Olimpiadalyq tribýnadan kóterilgen sportshylardyń elderine imidjdik dividendter alyp keledi. Otandyq sportshylar búkil álemdi moiyndatqan kezder, Qazaqstan týraly úlken qurmetpen jazylǵan dańqty jazbalar áli esimizde. Sondyqtan bizdiń ministrlik sportshylarymyzdyń oiyndaryn aqparattyq qamtamasyz etýge jáne olardyń Olimpiada litsenziialary úshin kúresýine árdaiym óz úlesin qosady», - dedi ol.
Bir jyl ýaqyttan keiin Tokioda jazǵy Olimpiada Oiyndary bastalady. «Ulttyq Olimpiadalyq Komitettiń prezidenti Timýr Asqaruly Qulybaevtyń tapsyrmasy boiynsha qazirgi tańda olimpiadaǵa qyzý daiyndyq júrip jatyr. Sportshylarymyz litsenziialaryn alý úshin baryn salyp jatyr. Olardyń jarystarǵa qatysyp, joldamalarǵa kúres barysyn halyqqa jetkizý mańyzdy. Osy oraida Ministrlikpen aqparattyq qoldaý týraly Memorandýmǵa qol qoiyp otyrǵanymyzǵa óte qýanyshtymyz», - dedi Sáken Musaibekov.
Aita ketsek, mundai birlesken joba alǵash ret júzege asyrylýda eken.
«Aqparat jáne qoǵamdyq damý ministrligine Qazaqstandaǵy paralimpiadalyq qozǵalysty halyq arasynda keńirek tanytyp, parasportshylarymyzdyń biik jetistikterimen bólisip, tanytý múmkindigi úshin úlken alǵys bildiremiz. Mundai birlesken joba alǵash ret júzege asyrylýda jáne osyndai dárejedegi jobaǵa Ulttyq Paralimpiadalyq komitettiń shaqyrylǵanyna qýanyshtymyz. Tokioda ótetin Paralimpiadalyq oiyndardyń teledidarlyq transliatsiiasy bolaryna úmittimiz, sebebi bizdiń elimizdiń tarihynda ol buryn sońdy bolmaǵan jaǵdai», - dedi Ulttyq Paralimpiadalyq komitetiniń direktory Erlan Súleimenov.
