QR Ulttyq Olimpiada komiteti sport direktsiiasynyń direktory Elsiiar Qanaǵatov elimiz tennisshileriniń Tokio Olimpiadasynda júldesiz qalýyna áser etken sebeptiń birin atady, dep habarlaidy QazAqparat.
«Aldymen, aitarymyz, tennis oiyny kezinde aýa raiy óte ystyq boldy. Múmkin bul uiymdastyrýshylardyń kemshiligi shyǵar. Biz tennisshilerden suradyq, olar kúnniń shamadan tys bolǵanyn aityp, oiyndy odan ári jalǵastyra almaǵandaryn aitty. Bizge osylai jaýap berdi. Basqa elderdiń de tennisshileri oiynnan shyǵyp qaldy», - dedi Elsiiar Qanaǵatov Ortalyq kommýnikatsiialar qyzmetinde ótken baspasóz máslihatynda.
Óz kezeginde QR Tennis federatsiiasynyń vitse-prezidenti Iýrii Polskii de óz pikirin alǵa tartty.
«Iá, rasymen, aýa raiynyń qolaisyzdyǵy keri áserin tigizdi. Basqa el sportshylary da oiynnan shyǵyp jatty. Bizdiń qyzdar jaqsy oiyn kórsetti dep oilaimyn. Sonymen qatar dárigerler de ádettegiden az boldy. Tennisshilerimiz bar kúsh jigerin saldy», - deidi ol.
